Хитай даирилири: бай көмүркан һуҗумчилири һәққидә учур бәргүчиләргә 500 миң сом мукапат берилиду

Мухбиримиз шөһрәт һошур
2015.10.14
xitay-saqchi-meschit-charlash.jpg Хитай қораллиқ сақчилири җүмә намизидин бурун мәсчит әтрапини чарлаватқан көрүнүш. 2009-Йили 10-июл, үрүмчи.
AFP

Хитайниң бай көмүркан һуҗумчилирини издәш опиратсийәси 25-күнигә қәдәм қойғанда, йәни 13-өктәбир күни бай наһийисиниң кан йезилиқ һөкүмитидә йиғин ечилип, һуҗум гумандарлиридин турсун җүмә, муса тохтинияз вә мәмәт әйса қатарлиқ кишиләр вә уларниң ғайиб аилә-тавабиатлири һәққидә учур бәргүчиләргә, тәминлигән учуриниң қиммитигә қарап, 200 миң, 300 миң вә 500 миң сом мукапат берилидиғанлиқи уқтурулған. Йиғинда йәнә мәзкур гумандарларни йошурғучилар өзини мәлум қилса, җинайәтчини йошуруш қилмишиға кәңчилик билән муамилә қилинидиғанлиқи әскәртилгән.

Мухбиримизниң бүгүн һуҗум гумандарлириниң тәвәлики болған канчи йезисидики кәнт мәсуллири, нөвәтчи хадимлириға қарита елип барған телефон зиярәтлири давамида қарши тәрәпниң әнсиз кәйпияти вә зорланма җаваблириму хитай тәрәпниң гумандарларни тепишта амминиң һимайисигә еришәлмигәнликини ашкарилимақта.

Мәлум болушичә, һуҗум гумандарлири һәққидики бәзи коча пәрәзлиридә һуҗум гумандарлириниң 3 аилә йәни 3 җәмәт кишилири икәнлики илгири сүрүлмәктә. Түнүгүн канчи йезилиқ һөкүмәт йиғинда елан қилған гумандарлар һәққидики уқтуруштиму “3 җәмәт” ибариси тилға елинған. Бүгүн йәнә бай көмүркан һуҗумини ениқлаш үчүн ақсуға барған, әмма хитайниң тосқунлуқи билән байға беришқа мувәппәқ болалмиған, бир чәтәл мухбириниң бизгә елхәт арқилиқ билдүрүшичә, ақсуда өткән һәптә бир тамға чапланған тутуш буйруқида бир нәпәр аял гумандарниңму рәсими көрситилгән. Әмма тутуш буйруқи узун өтмәй тамдин сөкүветилгән. Бу учур көмүркан һуҗумчилири арисида аялларниңму барлиқи вә һуҗумни елип барғучиларниң 3 җәмәт кишилири икәнлики һәққидики пәрәзниң асассиз әмәсликини ишарәтлимәктә.

Юқиридики аваз улинишидин мухбиримизниң бу һәқтә тәйярлиған программисини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.