Oymanbaytoqaydiki 41 neper siyasiy tutqundin 18 nepiri qoyup bérilgen

Muxbirimiz shöhret hoshur
2016-04-01
Share
xoten-tutqun-partlash-qarshiliq.jpg Ürümchi, yeken qatarliq jaylarda partlash yüz bergendin kéyin, xitay saqchilirining Uyghurlarni tutqun qiliwatqan körünüshi. 2014-Yili 27-may, xoten.
Oqurmen teminligen

Ghulja nahiyisining oymanbaytoqay kentide 41 neper kishining kompartiye ezasining nezirige barmighanliqi üchün tutqun qilin'ghanliqi ötken hepte dunyagha ashkarilan'ghan idi. Melum bolushiche, bulardin salahidin zaman qatarliq 18 nepiri mushu heptining charshenbe küni qoyup bérilgen.

Muxbirimiz qoyup bérilgenler heqqide melumat igilesh dawamida eyni chaghda yeni ikki ayning aldida mezkur 41 tutqunning bashlan'ghuch mektepte oquwatqan baliliriningmu saqchixana apirip soraq qilin'ghanliqi we diniy pa'aliyetlerge qétilmasliq heqqide agahlandurulghanliqi ashkarilandi.

Ehwaldin xewerdar kishiler rdiyomizgha mektup yollap oymanbaytoqayda tutqun qilin'ghan 41 siyasiy mehbustin 18 nepirining qoyup bérilgenlikini melum qildi. Biz bu uchurning toghriliqini éniqlash üchün eng awwal ara'östeng yéziliq saqchixanigha téléfon qilduq. Saqchi xadimi 18 neper tutqunning qoyup bérilgenlikini delilligen bolsimu, ularning néme üchün qoyup bérilgenliki, qalghanlirining néme üchün tutup turuluwatqanliqi heqqide melumat bérishni ret qildi.

Oymanbaytoqaydiki bir mehelle bashliqimu salahidin zaman qatarliq 18 neper tutqunning qoyup bérilgenlikini ashkarilidi, emma umu bularning qoyup bérilish sewebidin xewersiz ikenlikini éytti.

Yene bu mehelle bashliqining ashkarilishiche, buningdin ikki ay awwal mezkur 41 mehbus tutqun qilin'ghanda ularning bashlan'ghuch mektepte oquwatqan balilirimu saqchixanigha apirip soraqqa tartilghan we ular diniy pa'aliyetke qétilmasliq heqqide agahlandurulghan. Nareside balilargha qarita élip bérilghan bu soraq ularning rohiy keypiyatigha qattiq tesir qilghan.

Yene bir saqchi xadimining bayanliridin melum bolushiche, imam enwer hesen, mezin ekber nesirdin qatarliq 23 tutqun dawamliq halda tutup turulmaqta. Ular kompartiye ezasi harun dégen kishining nezirige barmighanliqidin ibaret atalmish jinayiti üchün ulargha qandaq jaza bérilidighanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet