Йәкәндә йүз бәргән 26 - сентәбир оданлиқ вәқәсиниң бир қисим тәпсилати ашкариланди

Мухбиримиз шөһрәт һошур
2013-10-10
Share
urumchi-herbiy-basturush-2013.jpg Хитай қораллиқ сақчи қисимлириниң үрүмчи шәһиригә киргүзгән броневиклири. 2013-Йили 29-июн.
AFP


Ашкарилинишичә, 26 - сентәбир күни йәкән наһийәси оданлиқ йезисиниң ханкөврүк вә раватөстәң қатарлиқ кәнтлиридә вәқә йүз бәргән. Вәқәдә сақчилар бомба ясаш гумани билән бир түркүм кишиләрни туруватқан өйидә қоршавға алған.

Сақчилар қоршав давамида гумандарларға қаритип чиқирип, уларниң бир қисимини өлтүргән вә бир қисимини яриландурған.

Дуня уйғур қурултийи өткән һәптә, йәкәнниң оданлиқ йезиси қатарлиқ җайларда арқа - арқидин вәқә йүз бәргәнлики, вәқәдә хитай сақчилири пуқраларға оқ чиқирип 7 кишини өлтүргәнлики һәққидә мәлумат елан қилған иди. Радиомиз хитайчә бөлүми бу һәқтә әһвал игилигинидә даириләр вәқәниң йүз бәргәнликини инкар қилған иди.

Мухбиримиз бүгүн оданлиқ йезисидики сақчи вә кәнт мәсуллириға телефон қилип вәқәниң тәпсилати һәққидә мәлумат сориди.

1

Мухбир: оданлиқта өткән һәптә йүз бәргән вәқәдин хәвириңиз болдиму?

Аһалә: иш чиқипту дәп аңлидуқ, тәпсилатидин хәвиримиз йоқ.

Мухбир: қәйәрдә иш чиқипту дәп аңлидиңлар?

Аһалә: ишни 21 - дадүй билән 16 - дадүйдә чиқипту дәп аңлидуқ.

Мухбир: нами немә у кәнтләрниң?

Аһалә: 21 - кәнт дегинимиз ханкөврүк, 16 - кәнт дегинимиз раватөстәң.

2

Мухбир: йезаңларда йүз бәргән вәқәдин хәвириңлар болдиму?

Аһалә: бир бир қисим бөлгүнчиләрни байқап тутупту дәң аңлидуқ.

Мухбир: аңлишиңларда вәқә қандақ башлинип қандақ ахирлишипту?

Аһалә: әслидә улар) гумандарлар( 4 - кәнттә бир өйдә топлишип туруватқанкән, кейин улар ханкөврүккә көчүпту, шу җәрянда сақчилар байқап қелип, шу өйни қоршавға елип тутупту дәп аңлидуқ.

Мухбир: демәк гумандарлар 4 - кәнттин 21 - кәнткә) ханкөврүккә( көчүш давамида паш боптиму?

Аһалә: һә, шундақ дәп аңлидуқ.

Мухбир: вәқәдә қанчә адәм өлүпту, қанчиси ярилинипту?

Аһалә: өлүпту дәң аңлидуқ, әмма қанчиси өлгинини билмидуқ.

3

Мухбир: бу оданлиқ сақчиханисидин сақчи нур елиму?

Сақчи: шундақ, мән шу.

Мухбир: ханкөврүктә йүз бәргән вәқәдә сизму вәзипә өтидиңизму?

Сақчи: мән әтиси шу йәрни мудапиә қилғини чиқтим.

Мухбир: нәқ мәйданда немиләрни көрдиңиз?

Сақчи: мән асаслиқи шопурлуқ қилдим, немә иш болғини тәпсилий билип кәтмидим.

Мухбир: вәқәдин қандақ хәвәр таптиңиз?

Сақчи: вәқә пәйшәнбә күни кәчтә йүз берипту, мени әтиси чақирипту, мән машина билән соҗаңни) сақчихана башлиқи( елип чиқтим.

Мухбир: қанчә машинида қанчә киши чиқтиңлар?

Сақчи: биз 3 машинида 15 - 16 киши чиқтуқ, биз чиқсақ наһийәниң сақчилири бар икән.

Мухбир: вәқә қандақ башлинип қандақ ахирлишипту?

Сақчи: уни мән уқмидим, мән пәқәт етишипту дәп аңлидим.

Мухбир: қарши тәрәпниң қолида қорал бармикән?

Сақчи: йоқ.

Мухбир: ундақта қандақ етишқан болиду?

Сақчи: яқ, етипту дедим.

Мухбир: вәқәдә қанчә киши өлүп қанчә киши ярилинипту?

Сақчи: сақчилардинму?

Мухбир: шундақ.

Сақчи: сақчилардин яриланған йоқ.

Мухбир: гумандарлардинчу?

Сақчи: уни мән билмидим.

Мухбир: раватөстәңдики вәқәгә сиз қатнаштиңизму вәзипә өтәш үчүн?

Сақчи: яқ. Униңға мән бармидим.

Мухбир: раватөстәң билән ханкөврүктики вәқәниң қайси бурун йүз берипту?

Сақчи: ханкөврүктики йүз берип 4 күндин кейин раватөстәңдики йүз бәрди.

4

Мухбир: сиз 24 - кәнтниң партком секритариғу дәймән?

Секретар: шундақ, мән шу.

Мухбир: ханкөврүктә йүз бәргән вәқә немә вәқә у?

Секретар: шу вәтәнни парчилайдиған бөлгүнчиләрниң иши.

Мухбир: вәқәниң баш ахир қандақ болди?

Секретар: мән нәқ мәйданда йоқ, сақчилар бир тәрәп қилди, биз пәқәт сақчиларға маслишип бихәтәрлик тәдбирлирини ишлидуқ.

Мухбир: вәқәни немә сәвәбтин келип чиқти дәп аңлидиңиз? гумандарлар немә иш қилған икән?

Секретар: бомба ясиған икән.

Мухбир: ханкөврүктики вәқәдә қанчә киши өлди дәп аңлидиңиз?

Секретар: 3 киши.

Мухбир: яриланғанларчу?

Секретар: уни билмәймән.

Мухбир: раватөстәңдики вәқәдә қанчә киши өлүп қанчә киши яриланди?

Секретар: у санларни билмәймән.

Мухбир: болмиса шу җайда вәқә йүз бәргинидин хәвириңиз барму?

Секретар: хәвирим бар.

Һөрмәтлик радио аңлиғучилар, юқирида йәкәнниң оданлиқ йезисида йүз бәргән 26 - сентәбир вәқәсиниң бир қисим тәпсилатини диққитиңларға сундуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт