Керийәдики һамилә қәтлиам қилиш вәқәсидә йетәкчи рол ойниған йеза башлиқи әнивәр исмайил хизмитидин тохтитилди

Өткән йилниң ахириқи күнлири керийәниң ариш йезисида һамилә қәтлиам қилиш вәқәси йүз берип ана қарнидики 6 айлиқтин 9 айлиққа қәдәр болған 4 һамилә мәҗбурий чүшүриветилгән иди. Вәқә үндидар вә хәлқара ахбарат вастилири арқилиқ дуняға ашкариланғандин кейин хотән вилайәтлик вә керийә наһийәлик алақидар органлар вәқә үстидә тәкшүрүш елип барған. Тәкшүрүштин кейин өткән айда зиянкәшликкә учриған аилиләргә берип әпу сориған хитай даирилири, мушу айниң бешида мәзкур вәқәдә йетәкчи рол ойниған муавин йеза башлиқи әнивәр исмайилни хизмитидин тохтатқан. Әмма вәқәниң баш ролчиси хитай секритар сүн җибиңға һечқандақ җаза кәлмигән.

Төвәндә мухбиримиз шөһрәт һошурниң бу һәқтә тәйярлиған программисини аңлайсиләр:

Һөрмәтлик радио аңлиғучилар, хотән вилайәтлик алақидар органлар керийәдә йүз бәргән һамилә қәтлиам қилиш вәқәси үстидин тәкшүрүш елип барғандин кейин, вәқә йүз бәргән нурлуқ дохтурханисиға 400 миң сом җәриманә қойған. Мәлум болушичә, вилайәт йәнә ариш йезилиқ һөкүмәткиму 1 милйон 200 миң сом җәриманә қойған; бу җәриманә пулни йеза тәвәсидики барлиқ ишчи - хизмәтчиләрдин тутувалған. Әмма, бу пул зиянкәшликкә учриған аилиләргә берилмигән, пул вилайәт малийәсигә ағдурулған.

Йәнә мәлум болушичә, вилайәт вәқәниң садир болушида йетәкчи рол ойниди дәп қариған йеза башлиқи аватхан билән муавин йеза башлиқи әнивәр исмайилни хизмитидин тохтитиш һәққидә буйруқ чүшүргән. Әмма наһийәдики даириләр йеза башлиқи аватханни хизмәттики башқа нәтиҗилирини көздә тутуп, җазадин қоғдап қалған. Даириләр пиланлиқ туғутқа мәсул йеза башлиқи әнивәр исмаилни, вәқәни вилайәткә алдин мәлум қилмиған йәни һамилә чүрүшниң алдида әһвални юқириға доклат қилмиған дегән әйиблимә билән хизмәттин тохтатқан.

Вәқә йүз бәргән мәзгилдики телефон зиярәтлиримиз давамида йеза башлиқи аватхан өзиниң хата қилғанлиқини үстигә елип һамилә қәтлиамини әмди тохтидиғанлиқини ейтқан вә дохтурханида нөвәт күтүп туруватқан һамилдар аялни дохтурханидин қоюп беридиғанлиқини ейтқан. Аватхан йәнә йезилиқ партком секритари сүн җибиңниңму бу иштин хәвири барлиқини ашкарилаш арқилиқ, вәқәдики җавабкарниң ялғуз өзи әмәсликини ейтқан.

Шу чағда йәнә муавин йеза башлиқи әнивәр исмаилму, вәқәдин секритар сүн җибиңниң хәвири барлиқини, һәтта қаттиқ сүйләш арқилиқ өзигә бесим ишләткәнликини ашкарилиған иди.

Һөрмәтлик радио аңлиғучилар, юқириқи мәлуматлардин қариғанда, керийәдә йүз бәргән һамилә қәтлиам қилиш вәқәсидә йетәкчилик җәһәттин 3 - орунда рол ойниған әнивәр исмайил хизмитидин тохтитилған, иккинчи дәриҗилик рол ойниған йеза башлиқи аватхан пәқәт тәнқидләнгән вә қоғдап қелинған; әмма баш рол ойниған секритар сүн җибиңға һечқандақ җаза кәлмигән. У нөвәттә зиянкәшликкә учриған аилиләр билән зиянкәшлик қилғучи органлар оттурисида мурәссәчилик рол ойнимақта.