Qaghiliqta xitay saqchixanisigha hujum qilghan 13 adem öltürülgen

Xitay axbaratigha qarighanda, shenbe küni yene bir nechche Uyghur mashina bilen xitay saqchixanisigha hujum qilghan, xitay saqchiliri hujumchilardin 13 ademni étip öltürgen.

Bu Uyghur élide yüz bergen eng yéngi qanliq weqe bolup hésablinidu.

Shinxu'a agéntliqining bu heqtiki xewiride hujumchilarning partlatquch qachilan'ghan bir aptomobil bilen qaghiliq nahiyelik j x idarisige bésip kirgenliki, aptomobilni partlitip 3 xitay saqchisini yarilandurghanliqi körsitilgen.

Xitay ilgiri Uyghur élide bu xilda élip bérilghan hujumlarni diniy ashqunlargha dönggep kelgen bolsimu, bu nöwetlik hujumni kimning qilghanliqini téxi ashkarilimidi.

Hazirche hujumchilarning kimki, hujumning qandaq teshkilligenliki heqqide melumatlar éniq emes.

Mezkur hujum “22 - May ürümchi etigenlik bazar hujumi” din kéyin pütkül Uyghur éli miqyasida bixeterlik tedbirliri qatmuqat kücheytilgen mezgilde yüz berdi.

Ürümchi etigenlik bazar hujumida 43 adem ölgen, yüzge yéqin adem yarilan'ghan idi.

Xitay hökümiti shundin kéyin Uyghur élde bir yilliq atalmish térrorluqqa zerbe bérish herikiti qozghighan we bir nechche qétim ochuq meydan soti échip, nechche on Uyghurgha ölüm jazasi bergen we nechche on Uyghurni uzun yilliq qamaq jazalirigha buyrughan.

Xitayning bu xil basturush siyasitige inkas qayturghan mulahizichiler, xitayning Uyghur xelqini radikalliq qistawatqanliqi, qoral küchi bilen tinchliq ornatqili bolmaydighanliqini agahlandurghan idi.