Bir qisim Uyghurlar antaliyede shi jinpinggha qarshi naraziliq namayishi ötküzdi

15-Noyabir küni türkiyening antaliye shehiride ötküzülgen 20 dölet guruhi aliy rehberliri yighini jeryanida bir qisim Uyghurlar antaliye jumhuriyet meydanigha yighilip xitay dölet re'isi shi jinpinggha qarshi naraziliq namayishi ötküzdi.

Türkiyening eng chong ammiwi teshkilatliridin biri bolghan türk ojaqliri teshkilati antaliye shöbisining bir qisim ezalirimu qatnashqan bu namayishni qeyseride pa'aliyet élip bériwatqan sherqiy türkistan medeniyet we hemkarliq jem'iyiti uyushturghan bolup, ular qolida dunya Uyghur qurultiyi re'isi rabiye qadir xanimning resimi bésilghan astigha “Sherqiy türkistan'gha erkinlik”, “Ilham toxtigha erkinlik”, “Shi jinping xitaygha qayt” we “ Shi jinping bésimingni toxtat” dégen sho'arlar yézilghan lozunkilarni kötürgen halda namayish qildi.

Sherqiy türkistan medeniyet we hemkarliq jem'iyiti re'isi séyit tümtürk ependi muxbirlargha bayanat berdi. Bu namayish meydanigha türk axbarat wasitiliridin sirt yene bezi xelq'araliq ammiwi axbarat wasitilirining muxbirlirimu kelgen.

Biz bu namayish heqqide namayishni uyushturghan dunya Uyghur qurultiyi mu'awin re'isi séyit tümtürk ependi we abdughéni békin ependilerni ziyaret qilduq.

Séyit tümtürk ependi bu namayishqa uzundin béri teyyarliq qilghanliqini, türkiyening bixeterlik organlirining tosushigha qarimay ming bir teslikte antaliyege bérip namayish qilghanliqini bayan qildi.

Séyit tümtürk ependi namayishta muxbirlargha bergen bayanatida, xitay dölitining iqtisadiy küchini ölchem qélip g20 döletlerge eza qilishning toghra emeslikini, Uyghur, tibet we mongghullarning insan hoquqlirini depsende qiliwatqan xitayning dölet re'isi jinpingning bu yighin'gha qatnishishini eyibleydighanliqini bayan qilghan.

Séyit tümtürk ependi türkiye dölet téléwizyesi we xelq'araliq axbarat wasitiliride bu namayishni xewer qilip bergenlikini bayan qildi.

Namayishqa qatnashqan abdughéni ependi özlirining 20 dölet aliy rehberliri yighini échilghan antaliyede 11-ayning 15-küni namayish ötküzüp xitay dölet re'isi shi jinpinggha naraziliq bildürgenlikini, türkiye re'is jumhuri erdoghanning Uyghurlargha ige chiqip, Uyghurlarning derdini xitay re'isige éytishini telep qilghanliqini bildürdi.

Türkiyening antaliye shehiride chaqirilghan 20 dölet aliy rehberliri yighinigha amérika prézidénti barak obama, yaponiye bash weziri shinzo abé, rusiye dölet re'isi wladimir putin we xitay dölet re'isi shi jinping we bashqilar qatnashqan bolup, nuqtiliq halda süriye mesilisi, térrorluqqa qarshi küresh we dunya iqtisadiy mesililiri muzakire qilin'ghan.