Ürümchi ulanbay ösmürler türmiside weqe chiqqanliqi, 10 din artuq kishi ölgenliki ilgiri sürülmekte

Muxbirimiz shöhret hoshur
2016-05-28
Élxet
Pikir
Share
Print
Uyghur akadémik ilham toxti ömürlük qamaq jazasigha höküm qilin'ghandin kéyin qamalghan ürümchi sheherlik 1-türme. 2014-Yili 24-séntebir, ürümchi.
Uyghur akadémik ilham toxti ömürlük qamaq jazasigha höküm qilin'ghandin kéyin qamalghan ürümchi sheherlik 1-türme. 2014-Yili 24-séntebir, ürümchi.
Photo: RFA


Tünügün anglighuchilirimizdin biri radi'omizgha mektup yollap, ürümchi ulanbaydiki türmide qanliq weqe chiqqanliqini, weqede 3 neper saqchi, 10 neper mehbusning ölgenlikini melum qildi. Muxbirimiz bügün bu heqte ürümchidiki saqchixanilargha téléfon qilghanda, weqening ulanbaydiki ösmürler türmiside chiqqanliqi, weqe 26 - may kéche sa'et bir etrapida yüz bérip seher 6 lerde alahide saqchilar teripidin bésiqturulghanliqi delillendi. Da'iriler weqeni mexpiy tutush heqqide mexsus uqturush chiqarghanliqi üchün weqede ölgenlerning sani aydinglashmidi.

Biz bu weqe heqqide yip uchi tapshuruwalghandin kéyin, awwal ürümchi sheherlik yungféng saqchixanisigha téléfon qilduq. Saqchi xadimi ulanbayning öz teweliki emeslikini bayan qilip weqedin xewersizlikini éytti.

Biz arqidin xu'angxé yoli saqchixanisigha téléfon qilduq, bu xadim weqe heqqide özining melumat bérelmeydighanliqini, bu heqte sheherlik saqchi idarisidin melumat sorishimizni tewsiye qildi.

Chidawan saqchixana xadimi ulanbayning qarlighach saqchixana teweliki ikenlikini bildürdi we weqedin xewersizlikini éytti. Ghalibiyet saqchixanisining xadimi bolsa özining ulanbay türmiside chiqqan weqedin xewiri barliqini, emma weqeni mexpiy tutush heqqide yuqiridin buyruq bolghachqa weqeni ashkariliyalmaydighanliqini éytti.

Biz axiri, ulanbay tewelikige mes'ul bolghan qarlighach saqchixanisigha téléfon qilduq. Téléfonimizni alghan saqchi xadimi weqedin özining kéche sa'et 2 de xewerlendürülgenliki we saqchixanigha chaqirtilghanliqini, emma neq meydan'gha barmighanliqini éytti.

Uning bayan qilishiche, weqe ulanbaydiki ösmürler türmiside yüz bergen, weqede mehbus yaki mehbuslargha oq chiqarghan saqchi da'iriler teripidin "2 - Derijilik xizmet körsetti" dep békitilgen we bu heqte mexsus yighin échilmaqchi bolghan bolsimu, namelum seweb bilen bu qarar élan qilinmighan.

Bu xadim weqede oq chiqarghan saqchining weqe heqqidiki uchurni mexpiy tutmighanliqi üchün yeni ündidargha yollap qoyghanliqi üchün mukapatning bikar qilin'ghanliq yaki shu saqchining tekshürülüwatqanliq éhtimalliqini ilgiri sürdi.

Yuqirida ürümchi ulanbaydiki ösmürler türmiside qanliq weqe chiqqanliqi heqqide deslepki uchurlirimizni diqqitinglargha sunduq.

Toluq bet