Хотәндики бир қисим кишиләрниң гумида йүз бәргән бомба партлаш вәқәси һәққидики инкаслири

19 - Сентәбир радиойимизниң мухбири хотән вилайитиниң гума наһийиси көктерәк йезиси 23 - кәнтидә 10 - сентәбир сақчилар бир гумандарниң һойлисидики гәмини тәкшүрүватқан чеғида бомба партлаш йүз берип, наһийилик сақчи идарисиниң муавин башлиқи вә ундин башқа бир қанчә сақчиниң өлгәнликини ашкарилиған иди.

Биз бу мунасивәт билән бүгүн хотән шәһиридики бир қанчә меһманханиға телефон қилип мәзкур вәқә һәққидә бир қисим инкасларға игә болдуқ.

Алди билән телефон зияритимизни қобул қилған хотән вилайәтлик ғәрбий юрт меһманханисиниң мәсули бизниң хотәнниң йеқиндин буянқи әһвали, болупму гума наһийисидә бомба партлиғандин кейинки вәзийәт һәққидики соаллиримизға җаваб берип:“хотәнниң һазирқи вәзийити вә бихәтәрлик яхши.Гума наһийисидә партлиған бомба вәқәси у бир кичик вәқә, тәсири анчә чоң әмәс.Лекин, һазир хотәндә бихәтәрлик хизмәтлири наһайити қаттиқ елип бериливатиду”деди.

Меһманхана мәсули бизниң: - “сизниң бихәтәрлик хизмити наһайити қаттиқ елип бериливатиду? - дегиниңиз немини чүшәндүриду?” - дегән соалимизға җаваб берип:“кимлик тәкшүрүш,тизимлаш,ахтуруш дегәндин ибарәт”деди.

У,бизниң хотәнгә барған кишиләр башқа наһийиләргә, мәсилән; гума наһийисигиму зиярәткә барса боламду?дегән соалимиз һәққидә тохтилип:“мән буни билмәймән”деди.

Биз,униңдин:“- гумида бомба партлиғанлиқи тоғрисида гезитләрдин бирәр хәвәр көрдиңизму?”дегинимиздә,у:“гезитләрдә бу һәқтә хәвәр бәрмидиғу дәймән.Мән гезит вә башқа материялларда бу һәқтә һечқандақ хәвәр көрмидим.Бирақ,башқилардин бомба партлиғанлиқини аңлидим”деди.

Меһманхана мәсулидин “биз: - сизләр бомба партлиғанлиқи һәққидә меһманхана хизмәтчилиригә йиғин ачмидиңларму?” - дәп сориғинимизда,у:“биз бу тоғрисида йиғин ачмидуқ. Бирақ,сақчи идариси,қанун комитети бизгә йиғин ечип бизниң меһманхана бихәтәрлик хизмитини күчәйтишимиз керәкликини ейтти.Бирақ,бу һәқтә сөз қилмиди”деди.

У,зияритимиз җәрянида йәнә:“мән меһманхана мәсули шуңа қанун орунлириниң сөзини аңлишим керәк. Сиз шуни билишиңиз керәкки вәқә садир болған йәрниң әлвәттә, бихтәрлики күчәйтилиду”деди.

Биз шуниң билән йәнә хотән шәһиридики венҗу меһманханисиға телефон қилип:“гумида бомба партлиғандин кейин хотәнниң вәзийитини анчә яхши әмәс дәп аңлидуқ.Шундақму?”дәп сориғинимизда,телефонимизни қобул қилған күткүчи хитай қиз пәс авазда:“шундақ”дәп җаваб бәрди.

Биз униңдин йәнә :“гума вәқәси бесиқтурулуп болдиму?вәқәдә қанчә адәм өлүпту?”дәп сориғинимизда у, қиз:“вәқә бесиқтурулуп болди.Кәчүрисиз мән вәқәдә қанчә адәм өлгәнликини билмәйдикәнмән.Биз бу һәқтә учур тапшуруп алмидуқ”деди.

Зияритимизни қобул қилған хотән педагогика институтиниң йенидики бейҗиң шилу меһманханисиниң күткүчиси хотәнниң йеқиндин буянқи вәзийити вә гумида йүз бәргән вәқә һәққидики соаллиримизға җаваб берип:“мән гумида бомба партлиғанлиқини башқилардин аңлидим.Биз һазир нормал хизмәт қиливатимиз.Вәқәниң бизгә тәсири зор болмиди.Бирақ,хотәндә һазир бихәтәрлик тәкшүрүш хизмәтлири қаттиқ елип бериливатиду. Аммиви сорунларға барсиңиз кимликиңизни көрүш билән биргә сомка вә бәдәнлириңизни тәкшүриду.Гумидики вәқәдин кейин шундақла үрүмчидә ечиливатқан асия - явропа көргәзмә йиғиниға мәркәздин рәисләр кәлгәнлики үчүн һазир бихәтәрликни вә тәкшүрүшни даириләр күчәйтивәтти”деди.

Биз ахирида гумида йүз бәргән бомба партлаш вәқәси тоғрисида хотән педагогика институтиға телефон қилип, бу һәқтә уйғурлардин учур игилимәкчи болған болсақму бирақ,телефонимиз җаваб қалди.

Юқириқи аваз улинишидин тәпсилатини аңлаң.