Белгийә, норвегийә вә голландийәләрдә «5-июл үрүмчи вәқәси» ни хатириләш намайишлири өткүзүлди

Ихтиярий мухбиримиз әкрәм
2018-07-06
Елхәт
Пикир
Share
Принт
5-Июл норвегийәдә өткүзүлгән намайиштин бир көрүнүш. 2018-Йили 5-июл. Норвегийә.
5-Июл норвегийәдә өткүзүлгән намайиштин бир көрүнүш. 2018-Йили 5-июл. Норвегийә.
RFA/Ekrem

Дуня уйғур қурултийиниң чақириқиға бинаән 5-июл күни муһаҗирәттики уйғурлар охшимиған шәкил вә көләмләрдә 2009-йилидики «5-июл үрүмчи вәқәси» ниң 9 йиллиқини хатириләш намайишлири елип барди. Белгийәдики намайишқа явропа иттипақи ташқи ишлар комитетиниң тәклипи билән бирюсселға йетип кәлгән д у қ ниң рәиси долқун әйса әпәндиму қатнишип нутуқ сөзлиди.

Белгийәдики намайишқа қатнишиватқан бир қисим уйғурлар телефон зияритимизни қобул қилип, намайиш әһвалидин бизни хәвәрдар қилди һәмдә бу қетимлиқ намайишқа болған қарашлирини баян қилип өтти. 

Бирюсселдики намайишни тәшкиллигән белгийә уйғур җәмийитиниң рәиси абдуллам намайишниң өзлири ойлиғандәк яхши үнүмләрни көрсәткәнликини вә шу йәрлик кишиләрниң диққитини тартқанлиқини тилға алди. Белгийәдә олтурушлуқ уйғур мойсипитлиридин қурбан ака өзлириниң бу хил намайишларни 9 йилдин буян давамлаштуруп кәлгәнликини әскәртти. Белгийәдики уйғур сиясий актиплиридин гүлниса ханим болса уйғур елидики «йиғивелиш лагерлири» ни тақаш үчүн муһаҗирәттики барлиқ уйғурларниң паал һәрикәт қилишини тәләп қилди. Рәйһангүл ханим бу намайишниң яхши өткәнликини муәййәнләштүрди. Сиясий актиплардин әкбәрҗанму намайишниң җушқун кәйпият ичидә өткәнликини баян қилди. 

5-Июл күни норвегийә пайтәхти осло шәһиридиму көлими зор болған бир намайиш өткүзүлгән. Намайиш үчүн һәрқайси шәһәрләрдин кәлгән уйғурлар норвегийә парламент бинаси алдиға җәм болуп, бу йәрдә бир саәт әтрапида намайиш елип барған, андин нобел тинчлиқ сарийиға қарап йүрүш қилған. Норвегийәдин бизгә учур бәргән д у қ иҗраийә комитетиниң муавин рәиси сәмәт абла әпәнди намайишниң толиму һәйвәтлик вә һаяҗанлиқ өткәнликини тилға алди. Норвегийә уйғур комитетиниң рәиси бәхтияр әпәнди бу намайишниң йәрлик норвег хәлқигиму тәсир көрсәткәнликини сөзләп өтти. 

5-Июл күни йәнә голландийәдики уйғурларму намайиш өткүзүп, «5-июл вәқәси» ниң 9 йиллиқини хатирилигән. Голландийәдики уйғурлар голландийә парламенти алдиға җәм болуп, җараңлиқ шоарлар билән хитай һакимийитигә болған наразилиқлирини баян қилишқан. Намайиш иштиракчилиридин бири бу қетимқи намайишниң голландийә тарихида өткүзүлгән иккинчи қетимлиқ көлими зор намайиш болғанлиқини тилға алди.

5-Июлниң алдинқи күнлири қазақистан вә қирғизистандики бирқисим уйғурларму охшимиған шәкилләрдә «5-июл үрүмчи вәқәси» ниң 9 йиллиқини хатириләш паалийәтлири елип барғанлиқи мәлум.

Пикирләр (0)
Share
Толуқ бәт