Bélgiye, norwégiye we gollandiyelerde “5-Iyul ürümchi weqesi” ni xatirilesh namayishliri ötküzüldi

Dunya Uyghur qurultiyining chaqiriqigha bina'en 5-iyul küni muhajirettiki Uyghurlar oxshimighan shekil we kölemlerde 2009-yilidiki “5-Iyul ürümchi weqesi” ning 9 yilliqini xatirilesh namayishliri élip bardi. Bélgiyediki namayishqa yawropa ittipaqi tashqi ishlar komitétining teklipi bilen biryussélgha yétip kelgen d u q ning re'isi dolqun eysa ependimu qatniship nutuq sözlidi.

Bélgiyediki namayishqa qatnishiwatqan bir qisim Uyghurlar téléfon ziyaritimizni qobul qilip, namayish ehwalidin bizni xewerdar qildi hemde bu qétimliq namayishqa bolghan qarashlirini bayan qilip ötti. 

Biryusséldiki namayishni teshkilligen bélgiye Uyghur jem'iyitining re'isi abdullam namayishning özliri oylighandek yaxshi ünümlerni körsetkenlikini we shu yerlik kishilerning diqqitini tartqanliqini tilgha aldi. Bélgiyede olturushluq Uyghur moysipitliridin qurban aka özlirining bu xil namayishlarni 9 yildin buyan dawamlashturup kelgenlikini eskertti. Bélgiyediki Uyghur siyasiy aktipliridin gülnisa xanim bolsa Uyghur élidiki “Yighiwélish lagérliri” ni taqash üchün muhajirettiki barliq Uyghurlarning pa'al heriket qilishini telep qildi. Reyhan'gül xanim bu namayishning yaxshi ötkenlikini mu'eyyenleshtürdi. Siyasiy aktiplardin ekberjanmu namayishning jushqun keypiyat ichide ötkenlikini bayan qildi. 

5-Iyul küni norwégiye paytexti oslo shehiridimu kölimi zor bolghan bir namayish ötküzülgen. Namayish üchün herqaysi sheherlerdin kelgen Uyghurlar norwégiye parlamént binasi aldigha jem bolup, bu yerde bir sa'et etrapida namayish élip barghan, andin nobél tinchliq sariyigha qarap yürüsh qilghan. Norwégiyedin bizge uchur bergen d u q ijra'iye komitétining mu'awin re'isi semet abla ependi namayishning tolimu heywetlik we hayajanliq ötkenlikini tilgha aldi. Norwégiye Uyghur komitétining re'isi bextiyar ependi bu namayishning yerlik norwég xelqigimu tesir körsetkenlikini sözlep ötti. 

5-Iyul küni yene gollandiyediki Uyghurlarmu namayish ötküzüp, “5-Iyul weqesi” ning 9 yilliqini xatiriligen. Gollandiyediki Uyghurlar gollandiye parlaménti aldigha jem bolup, jarangliq sho'arlar bilen xitay hakimiyitige bolghan naraziliqlirini bayan qilishqan. Namayish ishtirakchiliridin biri bu qétimqi namayishning gollandiye tarixida ötküzülgen ikkinchi qétimliq kölimi zor namayish bolghanliqini tilgha aldi.

5-Iyulning aldinqi künliri qazaqistan we qirghizistandiki birqisim Uyghurlarmu oxshimighan shekillerde “5-Iyul ürümchi weqesi” ning 9 yilliqini xatirilesh pa'aliyetliri élip barghanliqi melum.