Уйғур ана тил тәтқиқати муһакимә йиғини истамбулда чақирилмақчи

Мухбиримиз әркин тарим
2017-02-12
Елхәт
Пикир
Share
Принт
Уйғур ана тил тәтқиқати муһакимә йиғининиң елан сүрити
Уйғур ана тил тәтқиқати муһакимә йиғининиң елан сүрити
RFA/Erkin Tarim


Уйғур академийисиниң уюштуруши билән 2-айниң 19-күни истамбулда 7-нөвәтлик уйғур ана тил тәтқиқати, магистир вә докторлуқ унванлири үчүн оқуватқан оқуғучилар илмий муһакимә йиғини өткүзүлмәкчи.

Йиғинға түркийәдики бәзи уйғур тәтқиқатчилар вә түркийәниң һәрқайси университетлирида магистирлиқ һәм докторлуқ үчүн оқуватқан оқуғучилар иштирак қилмақчи. 2-Айниң 19-күни, йәни йәкшәнбә күни әтигән саәт 09:30 да башлинидиған йиғинда, уйғур академийисиниң рәиси абдулхәмит қарахан әпәнди ечилиш нутиқи сөзлигәндин кейин, һазир әнқәрәдә туриватқан уйғур ана тил паалийәтчиси абдувәли аюп әпәнди, истанбул университети һазирқи заман түркий тиллири вә әдәбияти факултети оқутқучиси доктор раһилә қәшқәрли ханимлар уйғур тили вә уйғур тили тәтқиқати тоғрисида доклат бәрмәкчи. Чүштин кейин түркийәниң һәрқайси университетлирида магистирлиқ вә докторлуқ оқуватқан уйғур оқуғучилар уйғурларниң тили, әдәбияти, тарихи вә уйғур җәмийити, хәлқара мунасивәтләр тоғрисида елип барған йеңи тәтқиқатлирини йиғин әһлилири билән ортақлашмақчи.

Истанбул фатиһ султан мәмәт вәхпи университетиниң истанбул зәйтинбурни мәвләвиханисидики залда өткүзүлидиған илмий муһакимә йиғини тоғрисида мәлумат игиләш үчүн мәзкур йиғинни уюштурғучи уйғур академийәсиниң рәиси абдулхәмит қарахан әпәнди, уйғур ана тил паалийәтчиси абдувәли аюп әпәнди вә әдирнә тиракя университетида тарих кәспидә докторлуқ оқуватқан давут җамал әпәндиләр билән телефон сөһбити елип бардуқ.

Абдулхәмит әпәнди 7-нөвәтлики өткүзүлидиған йиғин тоғрисида қисқичә мәлумат бәрди.

Абдувәли аюп әпәнди йиғинда бәрмәкчи болған доклати тоғрисида қисқичә мәлумат бәрди.

Давут җамал әпәнди йиғинда қәдимки уйғур тарихи тоғрисида доклат беридиғанлиқини баян қилди.

Абдувәли аюп әпәнди ана тил тоғрисида чақиридиған бу йиғинниң көп пайдилиқ болидиғанлиқини тәкитлиди.

Давут җамал әпәнди һәрқайси кәсипләрдә магистирлиқ вә докторлуқ оқуватқан оқуғучиларниң бир йәргә җәм болуп, өз тәтқиқатлирини ортақлишишиниң зор әһмийәткә игә икәнликини баян қилди.

Абдулхәмит қарахан әпәнди уйғур академийәси һәр йили чақириватқан бу йиғинниң үнүмлүк болуватқанлиқини илгири сүрди.

Уйғур ана тил тәтқиқати вә магистирлиқ вә докторлуқ унванлири үчүн оқуватқан оқуғучилар илмий муһакимә йиғини 2010-йилидин бери һәр йили өткүзүлүп келинмәктә. Йиғинда асаслиқи уйғур тили тоғрисида елип берилған тәтқиқатлар вә уйғурларниң ана тил сәзгүрликини қандақ юқири көтүрүш мәсилиси оттуриға қоюлмақта.

Толуқ бәт