Уйғур академийәси бу йил 40 нәпәр уйғур оқуғучиға «тәвпиқ оқуш мукапати» тарқитидикән

Ихтиярий мухбиримиз әркин тарим
2018-06-07
Елхәт
Пикир
Share
Принт
Уйғур академийиси илмий муһакимә йиғиниға қатнашқучилар хатириси. 2017-Йили 8-өктәбир, америка.
Уйғур академийиси илмий муһакимә йиғиниға қатнашқучилар хатириси. 2017-Йили 8-өктәбир, америка.
RFA/Qutlan

Йеқинқи йиллардин бери түркийәгә өз хираҗити билән келип оқуйдиған уйғур оқуғучиларниң көпийип бериши вә уйғур оқуғучиларниң аилиси билән болған алақисиниң үзүлүп қелиши сәвәблик зор иқтисадий қийинчилиқларға дуч кәлмәктчә.

Бу әһвални көздә тутқан бәзи мәрипәтпәрвәр тиҗарәтчиләр уйғур академийәси тәсис қилған «тәвпиқ оқуш мукапати» ға иқтисадий ярдәм қилип, мәзкур оқуш мукапатиниң соммиси вә намзатлар санини көпәйтти. Уйғур академийәси 2017-2018-оқуш йилида йәнә түркийәдә оқуватқан 40 уйғур оқуғучиға «тәвпиқ оқуш мукапати» беридиғанлиқини билдүрди.

Уйғур академийәсиниң рәиси абдулһәмит қарахан әпәндиниң ейтишичә, мәзкур оқуш мукапатиға көп сандики уйғур оқуғучилар илтимас қилған болуп, буларниң ичидин мукапат шәртлиригә лайиқ келидиған 40 нәпәр намзат таллинидикән.

Биз бу һәқтә йәниму тәпсилий мәлумат игиләш үчүн уйғур академийәсиниң рәиси абдулһәмит қарахан әпәнди билән сөһбәт елип бардуқ.

Аблимит қарахан әпәнди оқуғучиларниң оқуш нәтиҗиси вә иқтисадий шәрт-шараити қатарлиқ бир қатар әмәлий әһвалларға қарап туруп, 40 нәпәр уйғур оқуғучиға «тәвпиқ оқуш мукапати» беришни қарар қилғанлиқини баян қилди.

У «тәвпиқ оқуш мукапати» ниң бир мәрипәтпәрвәр уйғур тиҗарәтчиниң пул ианә қилиши билән 2014-йили тәсис қилинғанлиқини, һәр йили 10 нәпәрдин уйғур оқуғучиға оқуш мукапати бериватқанлиқини, бу йил йәнә бир мәрипәтпәрвәр уйғур тиҗарәтчиниң 40 уйғур оқуғучиға оқуш мукапати беридиғанлиқини ейтип, иқтисадий ярдәм қилғанлиқини баян қилди.

«Тәвпиқ оқуш мукапати» түркийә университетлирида докторлуқ, магистирлиқ вә бакалаврлиқ унвани үчүн оқуватқан уйғур оқуғучиларға бериливатқан болуп, доктурантларға 700 түрк лираси, магистир аспирантларға 500 түрк лираси вә толуқ курс оқуғучилириға 400 түрк лираси берилидикән.

Бу қетимлиқ «тәвпиқ оқуш мукапати» ға еришкән истанбул университетиниң оқуғучиси пәридә турсун зияритимизни қобул қилип, өзиниң оқуш нәтиҗилириниң яхши икәнликини, һазирқи қийин шараитта оқушини давамлаштуралиши үчүн мәзкур оқуш мукапатиниң көп йөләк болидиғанлиқини тәкитлиди.

Әнқәрә университетиниң оқуғучиси әнвәр әхмәтму зияритимизни қобул қилип, өзиниң аилиси билән алақиси үзүлүп қелип қейин күнләрни бешидин өткүзүватқанлиқини, мушундақ шараитта мәзкур оқуш мукапатиниң берилиши уни вә түркийәдики башқа уйғур оқуғучиларни толиму сөйүндүргәнликини баян қилди.

«Тәвпиқ оқуш мукапати» уйғур һазирқи заман тарихидики бүйүк ақартқучи вә ислаһатчи мәмәтели тәвпиқниң миллий маарип роһиға варислиқ қилиш, у яндурған мәрипәт мәшилини улғайтиш шундақла түркийәдә оқуватқан уйғур оқуғучиларға ярдәм қилиш мәқсити билән 2014-йили уйғур академийәси тәрипидин тәсис қилинған иди. Әйни вақитта муһаҗирәттә яшаватқан бирқанчә мәрипәтпәрвәр уйғур тиҗарәтчиниң иқтисадий ярдими билән тәсис қилинған бу оқуш мукапати 2014-йилидин башлап оқушта әла, миллий руһи күчлүк болған һәмдә түркийәдә өз хираҗити билән оқуватқан уйғур оқуғучиларға тарқитилип келиватқан иди.

Абдулһәмит қарахан әпәнди 2014-йилидин бүгүнгә қәдәр түркийәдә өз хираҗити билән толуқ курс, магистирлиқ вә докторлуқ унвани үчүн оқуватқан мунәввәр уйғур оқуғучилардин җәмий 59 нәпиригә «тәвпиқ оқуш мукапати» ниң берилгәнликини әскәртип өтти.

Пикирләр (0)
Share
Толуқ бәт