Уйғур тәтқиқатчи доктор бурһан сети түркийәниң дөләт мукапатиға еришти

Ихтиярий мухбиримиз арслан
2018-12-26
Елхәт
Пикир
Share
Принт
Уйғур тәтқиқатчи доктор бурһан сети әпәнди өзигә берилгән мукапатни түркийә җумһурийитиниң рәиси рәҗәп таййип әрдоғанниң қолидин тапшуруп алди. 2018-Йили декабир, түркийә.
Уйғур тәтқиқатчи доктор бурһан сети әпәнди өзигә берилгән мукапатни түркийә җумһурийитиниң рәиси рәҗәп таййип әрдоғанниң қолидин тапшуруп алди. 2018-Йили декабир, түркийә.
RFA/Arslan

Түркийә билимләр академийәси билән түркийә билим вә техника тәтқиқат идариси һәр йили бир қетим тәбиий пән вә иҗтимаий пәнләр саһәсидә көзгә көрүнәрлик нәтиҗә қазанған билим игилирини тәкшүрүп баһалаш һәмдә мукапатлаш паалийитини өткүзүп кәлмәктә. 2018-Йиллиқ баһалашта түркийә бойичә 37 яш тәтқиқатчи «юқири дәриҗидә нәтиҗә қазанған яш билим игилири» болуп баһалинип, мукапатқа еришти. Уларниң ичидә уйғурлардин йетишип чиққан ислам иқтисади бойичә яш мутәхәссис, доктор бурһан сети әпәндиму бар иди. У түркийә билимләр академийәси билән түркийә билим вә техника тәтқиқат идариси тәрипидин 2018-йиллиқ яш тәтқиқатчи болуп баһалинип мукапатқа еришти.

Мукапат тарқитиш мурасими 26-декабир күни түркийәниң пайтәхти әнқәрәдә өткүзүлди. Мукапатни түркийә җумһур рәиси рәҗәп таййип әрдоған, түркийә парламентиниң рәиси бинали йилдирим, түркийә санаәт вә пән-техника министири мустафа варанк вә түркийә билим вә техника тәтқиқат идарисиниң башлиқи қатарлиқлар бирликтә тарқатти.

Доктор бурһан сети әпәнди өзигә берилгән мукапатни түркийә җумһурийитиниң рәиси рәҗәп таййип әрдоғанниң қолидин тапшуруп алди.

Җумһур рәиси әрдоған мукапат алған билим игилирини тәбрикләп мундақ деди: «алди билән мукапатқа талланған пүткүл билим игилирини тиришчанлиқлири үчүн тәбрикләймән. Уларға өз намим, дөлитимиз вә миллитимиз намидин чоңқур тәшәккүр ейтимән. Улар билим һаятлириниң башланғуч нуқтисида туруп һәм университетларға, һәм аилилиригә иптихарлиқ билән күч көрсәткәнлики үчүн рәһмәт ейтимән.»

Биз бу һәқтә доктор бурһан сети әпәнди билән сөһбәт өткүздуқ.

Доктор бурһан сети әпәнди уйғур елиниң қумул диярида туғулған болуп, алий мәктәпни хитайниң далийән шәһиридә оқуған. Малайсия дөләт университетида ислам иқтисадшунаслиқи кәспи бойичә магистирлиқ вә докторлуқ унвани алған. Оқуш пүттүргәндин кейин коала-лампур университети билән малайсия хәлқара ислам университетида 6 йил оқутқучи болуп хизмәт қилған. Бу җәрянда дотсент вә алий лекторлуқ кәспий унвани билән хизмәт қилған. У 2018-йили 1-айдин башлап истанбул сабаһиддин заим университетиниң ислам иқтисади факултетида дотсент болуп хизмәт қилмақта икән.

Игилинишичә, доктор бурһан сети әпәнди бу қетим ислам иқтисадшунаслиқи вә пул-муамилә җәһәттә елип барған тәтқиқат нәтиҗилири билән бу мукапатқа еришкән икән.

Бурһан әпәнди мукапатни елиш җәряндики һес-туйғулирини баян қилип, мундақ деди: «мукапат мурасимидин илгири анчә хушал болмиған идим, бирақ мукапатни алғандин кейин хәлқимниң мени тәбриклиши, дәстәклиши вә қоллап қуввәтлишидин, хәлқимизгә бир үмид вә езилгән қәлбләргә бир чирағ болалиғанлиқимдин шундақ хушал болдум. Бу мукапат хәлқимгә мәнсуп, мән буни ашу җаза лагерлирида йетиватқан мәзлум хәлқимизниң қәлбигә кичик болсиму мәлһәм болғандәк бир һессиятта чүшәндим. . .»

Бурһан сети әпәндиниң билдүрүшичә, у һазир уйғурларниң иқтисади қийинчилиқлирини һәл қилиш йолида бир миллий фонд қуруш үчүн тәйярлиқ қиливатқанлиқини, имканийәт яр бәрсә миллий фондини йеқин кәлгүсидә қуруп чиқидиғанлиқини билдүрди.

Бурһан әпәнди уйғурларниң һазирқи әһвали тоғрисида тохтилип йәнә мундақ деди: «хәлқимиз еғир күнләргә қалди, зулум астида қараңғу бир патқаққа чөкүп кетиватиду. Бирақ бу зулум астидин парлиған яш бир әвладниң мәйданға чиқидиғанлиқиға ишинимән. Уларниң қайғуни күчкә айландуруп уйғур хәлқи үчүн бир үмид беғишлишини арзу қилимән.»

Пикирләр (0)
Share
Толуқ бәт