Atushta 70 kishining étiwétilgenliki heqqidiki uchurning toghriliqi aydinglashmidi

Xitay saqchiliri pichan weqeside muxbirlarning qolidiki resim tartish apparatini tartiwéliwatqan körünüsh. 2013-Yili 28-iyun.

Ötken hepte féysbuk qatarliq ijtima'iy axbarat wasitiliride, atushta 70 che Uyghurning xitay saqchiliri teripidin étiwétilgenliki heqqide uchur tarqalghandin kéyin, xewerning wehimisi muhajirettiki Uyghurlarni éghir derijide parakende qildi. Dunya Uyghur qurultiyi re'isi rabiye qadir xanim bu heqte mexsus bayanat élan qilip, musteqil axbarat organlirini bu heqte éniqlash élip bérip, Gumanni yéshishke chaqiriq qildi.

Radi'omiz muxbirliri bir heptidin buyan izchil éniqlash élip barghan bolsimu, ta bügün'ge qeder bu uchurning toghriliqi aydinglashmidi.

Weqe heqqide ijtima'iy axbaratta, atushta putbol oynawatqan we tamasha körüwatqan Uyghurlar bilen xitay saqchiliri arisida toqunush kélip chiqqanliqi, toqunushta 70 etrapida kishining étiwétilgenliki bayan qilin'ghan, uchurlardin biride, weqening üstün atushtiki bostan kentide yüz bergenliki, yene biride bolsa, weqening qeshqer -atush yoli üstide yüz bergenliki qeyt qilin'ghan. Bu uchurgha asasen, üstün atush bostan kentining sékrétari hemdul, üstün atush doxturxana bashliqi ghalip, dem élishqa chiqqan kent sékrétari abduréshit qatarliq 20 etrapida kishini téléfonda ziyarette qilduq. Ziyaret qilin'ghuchilarning hemmisi dégüdek weqedin xewersizlikini we bu heqte tunji qétim gep anglawatqanliqini bildürüshti.

Bu heqte muxbirlirimiz erkin, gülchéhre we qutlan teripidin élip bérilghan éniqlashlardimu, perqliq bir netije chiqmidi.

Yéqinqi aylardin béri Uyghur rayonining muqimliq weziyitining yene bir baldaq jiddiyleshkenliki, bu jeryanda xitay terepning uchurni téximu qattiq kontrol qiliwatqanliqi, dölet mexpiyetlikini ashkarilighanlarni qattiq jazalaydighanliqi heqqidiki tehdit we tedbirlirini kücheytkenliki közde tutulsa, ziyaret qilin'ghuchilarning yuqiriqi bayanliri yenila gumanliq. Shunga mezkur uchur heqqidiki éniqlashlirimiz yene dawamlishidu.