Үрүмчи өсмүрләр түрмисидә исян көтүргән 10 мәһбустин 3 нәпириниң ақсу айкөллүк икәнлики мәлум

Мухбиримиз шөһрәт һошур
2016-06-06
Share
urumchi-sheherlik-1-turme-2.jpg Үрүмчи шәһәрлик 1-түрмә. 2014-Йили 24-сентәбир, үрүмчи.
RFA

25-Май күни үрүмчи өсмүрләр түрмисидә чиққан исян һәққидә тунҗи хәвәр бәргән хоңкоңдики миңбав гезитиниң хәвиридә түрмидин қачқан 10 нәпәр мәһбусниң 9 нәпири 14-17 яш арисида икәнлики, булардин 3 нәпириниң абдусалам, насир вә мәвлан қатарлиқ ақсу айкөллүк балилар икәнлики баян қилинған.

Мухбиримиз бүгүн бу һәқтә айкөл сақчиханисиға телефон қилғинида, сақчилар түрмидин қачқан айкөллүк өсмүрләрниң кимлики һәққидә мәлумат берәлмиди. Әмма миңбавниң хәвиридики юқириқи мәлуматлар, радийомиз тәрипидин илгири ишләнгән "ақсу айкөлдики сиясий тутқунлар" намлиқ чатма хәвиримиздики мәлуматлар билән бәлгилик дәриҗидә охшашлиққа игә.

Биз миңбав гезитиниң юқириқи хәвириниң тоғра-хаталиқини ениқлаш үчүн, алди билән ақсуниң айкөл сақчиханисиға телефон қилдуқ. Сақчи хадимлири миңбав гезитидә тилға елинған өсмүрләрниң кимлики һәққидә мәлумат берәлмигән болсиму, әмма уларниң айкөллүк икәнликини инкар қилмиди. Телефонимизни қобул қилған сақчи мәзкур өсмүрләрниң делосини тутқан сақчилар билән алақилишишимизни тәвсийә қилди.

Миңбавниң хәвиридә түрмидин қачқан мәһбусниң бириниң абдусалам икәнлики тилға елинған, бизниң илгирики ениқлашлиримизда кунмиңдин қайтурулған вә айкөлдә тутқун қилинип 20 йиллиқ кесилгән 19 яшлиқ абдурахман розиниң абдусалам езиз қатарлиқ достлири билән бирликтә кесилгәнлики ашкариланған.

Миңбав гезитидә йәнә, абдусалам билән насирниң әслидә ақсу ишчи -техник мәктипиниң оқуғучиси икәнлики вә 2014-йили 11-айда тутулғанлиқи йезилған. Бизниң илгирики ақсу айкөллүк өсмүр мәһбус әли мамут һәққидики ениқлашлиримиз давамидиму әли мамутниң ақсу ишчи-техник мәктипиниң оқуғучиси икәнлики, униң савақдиши билән бирликтә 11-айда тутулғанлиқи вә террорлуқ гурупписи тәшкилләш билән әйиблинип муддәтсиз кесилгәнлики ашкариланған. Әйни чағдики ениқлашлиримизда йәнә мәзкур оқуғучиларниң аилә-тавабиатлири пәрзәнтлириниң топлишип қол телефони ойниғанлиқи, йәни қол телефонида аталмиш қанунсиз диний материялларни көргәнлики үчүн, мәзкур җазаға йолуққанлиқини илгири сүргән.

Миңбав гезитиниң хәвиридә 17 яшлиқ насир билән мәвланниң партлатқуч ясиғанлиқи үчүн җазаланғанлиқи тилға елинған. Бизниң илгирики ениқлишимизда, 19 яшлиқ мәһбус абдурахман розиниң достлири билән бирликтә бомба ясашқа аит материялларни төрдин көргәнлики йәни партлатқуч ясашни өгинишкә урунғанлиқиниңму, униң аталмиш җинайәтлиридин бири болғанлиқи илгири сүрүлгән.

Бизниң илгирики ениқлаширимизда, ақсу ишчи-техник мәктипидин тутулған вә кесилгәнләрдин әли мамут, абликим турсун вә абдусалам езиз қатарлиқ үч оқуғучидин башқа йәнә аз дегәндә 4 оқуғучи барлиқи мәлум болған, әмма кимликлири айдиңлашмиған иди. Шуңа миңбавниң хәвиридә дейилгән түрмидин қачқан 10 мәһбусниң ақсу айкөллүк икәнлики, буларниң абдусалам, насир вә мәвлан исимлик өсмүрләр икәнлики һәққидики мәлуматниң тоғрилиқини дәлиллимәктә.

Ақсу айкөлдә 2013-йили 8-айниң 8-күни йәни рамизан һарписида сақчиларниң халиғанчә адәм тутқун қилишиға қарши аммиви исян көтүрүлгән вә исян қанлиқ бастурулған иди. Шуңа 2014-йили уйғур районида қаттиқ зәрбә бериш долқуни қозғалғанда ақсу айкөл нуқтилиқ зәрбә бериш обйектиға айланған вә айкөл пәйшәнбә базардики көп санда яшлар билән бирликтә бир түркүм өсмүрләрму зәрбигә учриған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт