Мәһбубә абла: 20 йиллиқ түрмигә мәһкум қилинған анам вә инимниң гунаһи немә?!

Мухбиримиз гүлчеһрә
2018-07-18
Елхәт
Пикир
Share
Принт
Австрийәдә яшаватқан, икки балиниң аниси мәһбубәниң ата-аниси аблаҗан һәбибулла вә пәйзөһрә өмәр. (Вақти вә орни ениқ әмәс)
Австрийәдә яшаватқан, икки балиниң аниси мәһбубәниң ата-аниси аблаҗан һәбибулла вә пәйзөһрә өмәр. (Вақти вә орни ениқ әмәс)
RFA/Gülchéhre

Австрийәдә яшаватқан, икки балиниң аниси мәһбубә абла, ғулҗидики пүтүн тапқан-түгүнини балилириға атиғучи меһнәткәш ата-аниниң, йәни мәрипәтпәрвәр аилиниң қизи. У бу аилидин чәтәлгә чиқип оқуватқан 3 қизниң бири. Әмма, бултурдин башлап хитай һөкүмитиниң уйғурларға қаратқан бастуруш, тутқун қилишлирида униң ғулҗида қалған дадиси, аниси вә бирдин бир әркәк қериндиши, йәни униң пүтүн аилиси лагерға соланған.

Хитай сақчилири алди билән униң 28 яшлиқ иниси адилҗанни өткән йили, йәни 2017-йили, 4-айниң 15-күни тәрбийәләш лагериға тутуп кәткән, бир айдин кейин өйгә кәлгән сақчилар: «балаңлар йәңгил зәһәрлинипту, шуңа тәрбийәләшкә әвәттуқ» дегән. Мәһбубәниң ейтишичә, униң иниси, икки яшлиқ бир балиниң дадиси, бәхтлик бир аилә қурған болуп, гәрчә паспорти болсиму, чәтәлгиму чиқип бақмиған, һеч қандақ қанунсиз иш паалийәткә қатнишип бақмиған гунаһсиз тинч вә диндар бир әр иди. Аридин 16 ай өткәндин кейин, йәни бу йил, 2018-йили, 6-айниң 29-күни даириләр адилҗанни 20 йиллиқ түрмә җазасиға һөкүм қилған икән.

Мәһбубәниң бир өмүр кийим тиккүчилик қилип аилисини қамдап кәлгән бу йил 57 яшқа киргән аддий аниси пәйзөһрә өмәрни, даириләр өткән йили, 9-айниң 5-күни аталмиш тәрбийәләш лагериға тутуп кәткән, даириләр бир йил 6-айда униму 20 йиллиқ түрмигә ташлиған.

Мәһбубәниң дадиси, бу йил 59 яшқа киргән аблаҗан һәбибулланиму өткән йили, 2017-йили, 10-айда тәрбийәләш лагериға тутуп кетилгән болуп, һазирғичә шу лагерда турмақта икән.

Мәһбубәниң 80 яштин ашқан момиси турғунайниң, бу аилидики өзиниң һалидин хәвәр алғудәк һәммидин айрилғандин кейин, қандақ һаят кәчүрүватқанлиқи мәлум әмәс икән.

Мәһбубәниң аилиси билән болған телефон алақилири 2017-йилиниң бешидин тартипла үзүлүп қалған. У аилиси һәққидики учурларға, йеқинда бәзи уруқ-туғқанлири арқилиқ еришкән икән.

Зияритимизни қобул қилған мәһбубә, аилисидикиләрни пәқәт диний етиқадида чиң турғанлиқи үчүнла хитай һөкүмитиниң наһәқ вә еғир җазалишиға учриди дәп қаримақта икән. У өзиниң аилисигә кәлгән күлпәтләрни, хитай һөкүмитиниң йүргүзүватқан зораванлиқини паш қилишта тәшвишләрни йеңип җасарәт қилишқа, аилисигә болған чин сөйгүсиниң һәрикәтләндүргүч күч икәнликини билдүрүп, өзигә охшаш аилиси зулумға учраватқан чәтәлләрдики уйғурларниң таратқулар арқилиқ авазини чиқириши муһимлиқини тәкитлиди.

Пикирләр (0)
Share
Толуқ бәт