Mehbube abla: 20 yilliq türmige mehkum qilin'ghan anam we inimning gunahi néme?!

Muxbirimiz gülchéhre
2018.07.18
Mehbube-anisi-peyzohre-omer-atisi-ablajan-hebibulla.jpg Awstriyede yashawatqan, ikki balining anisi mehbubening ata-anisi ablajan hebibulla we peyzöhre ömer. (Waqti we orni éniq emes)
RFA/Gülchéhre

Awstriyede yashawatqan, ikki balining anisi mehbube abla, ghuljidiki pütün tapqan-tügünini balilirigha atighuchi méhnetkesh ata-anining, yeni meripetperwer a'ilining qizi. U bu a'ilidin chet'elge chiqip oquwatqan 3 qizning biri. Emma, bulturdin bashlap xitay hökümitining Uyghurlargha qaratqan basturush, tutqun qilishlirida uning ghuljida qalghan dadisi, anisi we birdin bir erkek qérindishi, yeni uning pütün a'ilisi lagérgha solan'ghan.

Xitay saqchiliri aldi bilen uning 28 yashliq inisi adiljanni ötken yili, yeni 2017-yili, 4-ayning 15-küni terbiyelesh lagérigha tutup ketken, bir aydin kéyin öyge kelgen saqchilar: “Balanglar yenggil zeherliniptu, shunga terbiyeleshke ewettuq” dégen. Mehbubening éytishiche, uning inisi, ikki yashliq bir balining dadisi, bextlik bir a'ile qurghan bolup, gerche pasporti bolsimu, chet'elgimu chiqip baqmighan, héch qandaq qanunsiz ish pa'aliyetke qatniship baqmighan gunahsiz tinch we dindar bir er idi. Aridin 16 ay ötkendin kéyin, yeni bu yil, 2018-yili, 6-ayning 29-küni da'iriler adiljanni 20 yilliq türme jazasigha höküm qilghan iken.

Mehbubening bir ömür kiyim tikküchilik qilip a'ilisini qamdap kelgen bu yil 57 yashqa kirgen addiy anisi peyzöhre ömerni, da'iriler ötken yili, 9-ayning 5-küni atalmish terbiyelesh lagérigha tutup ketken, da'iriler bir yil 6-ayda unimu 20 yilliq türmige tashlighan.

Mehbubening dadisi, bu yil 59 yashqa kirgen ablajan hebibullanimu ötken yili, 2017-yili, 10-ayda terbiyelesh lagérigha tutup kétilgen bolup, hazirghiche shu lagérda turmaqta iken.

Mehbubening 80 yashtin ashqan momisi turghunayning, bu a'ilidiki özining halidin xewer alghudek hemmidin ayrilghandin kéyin, qandaq hayat kechürüwatqanliqi melum emes iken.

Mehbubening a'ilisi bilen bolghan téléfon alaqiliri 2017-yilining béshidin tartipla üzülüp qalghan. U a'ilisi heqqidiki uchurlargha, yéqinda bezi uruq-tughqanliri arqiliq érishken iken.

Ziyaritimizni qobul qilghan mehbube, a'ilisidikilerni peqet diniy étiqadida ching turghanliqi üchünla xitay hökümitining naheq we éghir jazalishigha uchridi dep qarimaqta iken. U özining a'ilisige kelgen külpetlerni, xitay hökümitining yürgüzüwatqan zorawanliqini pash qilishta teshwishlerni yéngip jasaret qilishqa, a'ilisige bolghan chin söygüsining heriketlendürgüch küch ikenlikini bildürüp, özige oxshash a'ilisi zulumgha uchrawatqan chet'ellerdiki Uyghurlarning taratqular arqiliq awazini chiqirishi muhimliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.