Йеңисар сағанда аз дегәндә 4 кишиниң “тәрбийәләш мәркизи” дә өлгәнлики ашкариланди

Мухбиримиз шөһрәт һошур
2017.10.30
herbiy-saqchi-uyghur-boway.jpg Уйғур бовайниң коча чарлаватқан хитай қораллиқ әскәрлириниң йенидин өтүп кетиватқан көрүнүши. 2009-Йили 9-июл, үрүмчи.
AP

Йеқинда аңлиғучилиримиздин бири радийомизға мәктуп йоллап йеңисар наһийәсиниң саған йезисидин “тәрбийәләш мәркизи” гә кәткәнләрдин бирқанчисиниң арқа-арқидин өлгәнликини, өлгәнләрдин бириниң 71 яшлиқ һәсән имин дегән киши икәнликини мәлум қилған иди.

Мухбиримизниң йеңисар сағандики сақчиханилардин әһвал игилиши нәтиҗисидә сағанда 8‏-айдин һазирға қәдәр 3 ай ичидә аз дегәндә 4 кишиниң “тәрбийәләш мәркизи” дә һаятидин айрилғанлиқи, өлгүчиләрдин йәнә бириниң 60 нәччә яшлиқ савут рахман дегән киши икәнлики ашкариланди.

Радиомизға кәлгән мәктупта йеңисардики “йепиқ тәрбийәләш мәркизи” ниң шараитиниң начарлиқи вә роһий бесим сәвәбидин “тәрбийәләш мәркәзлири” дә өлүм-йетим вәқәлири йүз бериватқанлиқи, даириләрниң бу әһвални җәмийәткә тарқатмаслиқ һәққидә аһалиләрни агаһландуриватқанлиқи йезилған.

Биз бу әһвални ениқлаш үчүн алди билән йеңисарниң йеңийәр сақчиханисиға телефон қилдуқ. Сақчихана хадими, юқириқи әһвални рәт қилди. Йеңисар базарлиқ сақчихана хадимиму әһвал һәққидә мәлумат берилмиди.

Радийомизға кәлгән мәктупта “тәрбийәләш мәркизи” дә өлгәнләрдин бириниң 71 яшлиқ һәсән имин дегән киши икәнлики, униң бундин 10 йил бурун бир оғлини йәр асти диний мәктәпкә бәргәнлики үчүн “йепиқ тәрбийә” гә тутуп кетилгәнлики йезилған.

Саған йеза 1‏-кәнт сақчихана хадими һәсән иминниң 7‏-кәнт әзаси икәнлики вә буниңдин 2 ай бурун “тәрбийәләш мәркизи” дә һаятидин айрилғанлиқини паш қилди.

Саған сақчихана хадими болса, сағанниң 18‏-кәнтидин бир кишиниң “тәрбийәләш мәркизи” дә өлгәнликини баян қилди. Йәнә ениқлашлиримиз давамида сағанниң 6‏-кәнт сақчиси башқа кәнтләрдин өлгәнләрниң кимликини билмәйдиғанлиқини баян қилиш билән бирликтә өз кәнтидин савут рахман исимлик бир кишиниң бу йил авғустта, йәни 2 ай бурун “тәрбийәләш мәркизи” дә өлгәнликини мәлум қилди.

Сағанниң 15‏-кәнт сақчи хадими техи икки күнниң алдида 2‏-кәнттин бир кишиниң “тәрбийәләш мәркизи” дә өлгәнликини ейтти.

Юқирида сақчихана хадимлириниң еғизидин чиққан баянларға асасланғанда, радийомизға йолланған мәктуптики учурларниң асассиз әмәслики, йеңисарниң саған йезисиниң өзидинла йеқинқи үч ай ичидә аз дегәндә 4 кишиниң “тәрбийәләш мәркизи” дә җан үзгәнлики дәлилләнди.

Мәлум болушичә, йеңисарниң саған йезисида 21 кәнт, 101 мәһәллә, 23100 нопус бар икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.