Уйғур райониниң енергийә байлиқлириниң хитай өлкилиригә йөткилиш қәдими тизлитилмәкчи

Уйғур районлуқ һөкүмәт билән җяңсу өлкилик һөкүмәт пәйшәнбә күни "икки өлкиниң енергийә саһәсидики истратегийилик һәмкарлиқини илгири сүрүш" келишими имзалиған.
Мухбиримиз ирадә
2011.01.20

Келишимгә уйғур районлуқ һөкүмәтниң муавин рәиси күрәш мәхсут вә җяңсу өлкисиниң муавин өлкә башлиқи ши хепиң қол қойған.

Шинхуа торида берилгән хәвәрдә дейилишичә, келишим бойичә җяңсу өлкиси енергийә, көмүр вә тәбиий газға болған тәләпниң ешип беришидәк мәсилини һәл қилиш үчүн, "ғәрбниң газини шәрққә йөткәш", "шинҗаңниң көмүрини сиртқа тошуш" вә "шинҗаңниң електр токини сиртқа тошуш" қатарлиқ истратегийә пиланлириға нуқтилиқ мәбләғ салидикән. Уйғур райони йәнә җяңсу өлкисиниң уйғур районида кан байлиқи қезип тәкшүрүш ишлирини қоллап қуввәтләйдикән.

Шинхуа ториниң бу һәқтики хевирдин мәлум болушичә, уйғур райониниң муавин рәиси күрәш мәхсут мурасимдики сөзидә җяңсу өлкисиниң бай, ихтисас хадимлири толуқ болуштәк әвзәлликкә игә икәнликини, уйғур райониниң болса мол енергийә мәнбәсигә, болупму кан байлиқи җәһәттә әвзәлликкә игә икәнликини әскәртип, икки өлкиниң һәмкарлиқни күчәйтип, "ғәрбниң газини шәрққә йөткәш" "шинҗаңниң көмүрини сиртқа йөткәш" пиланлирини ишқа ашурушни илгири сүрүши керәкликини ейтқан.

Бу келишим арқилиқ җяңсу шәһиридин уйғур елигә ихтисаслиқ хадимлар сүпитидә адәм йөткилидиғанлиқи вә уйғур райони енергийә байлиқлириниң техиму илгирилигән сүрәттә хитай өлкилиригә йөткилидиғанлиқи мәлум болмақта.

Хитай даирилири 5 - июл вәқәсидин кейин уйғур районини 19 хитай өлкисигә бөлүп бериш арқилиқ уйғур районини башқуруш, енергийисини йөткәш вә көчмән йөткәш сияситини җиддий елип бериватқан болуп, буниңдин илгириму уйғур елиниң қәшқәр, хотән, ақсу вилайәтлириму ичкиридики һәрқайси өлкиләр билән бу хил келишимләрни түзгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.