Хитайниң гуаңдуң өлкиси хуйҗу шәһиридә уйғурлар билән хитайлар арисида тоқунуш йүз берип бир адәм өлди

Пәйшәнбә күни әтигән хитайниң гуаңдуң өлкиси хуйҗу шәһиридә хунәнлик хитайлар билән уйғур тиҗарәтчиләр арисида тоқунуш йүз берип, бир уйғур тиҗарәтчи өлтүрүлгән, нурғун адәм яриланған.
Мухбиримиз әркин
2010-12-03
Елхәт
Пикир
Share
Принт

Вәқә хуйҗу шәһириниң хуйчиң райони мәйди җәнубий йоли сода базириниң чиқиш еғизида йүр бәргән. Игилишимизчә, тоқунуш хунәнлик тәңзичиләр билән уйғур тиҗарәтчиләрниң йәр талишиш сәвәбидин келип чиққан. Лекин, хитай мәтбуатлириниң хәвәрлиридә җедәлниң кимниң башлиғанлиқиға даир тәпсилатлар тилға елинмиған болуп, сақчи тәрәпниң вәқәни тәкшүрүватқанлиқи илгири сүрүлгән.

Бу вәқә өткән йили гуаңдуңниң шявгүән наһийисидә хитай ишлар уйғур ишләмчиләргә һуҗум қилип, аз дегәндә 17 уйғур ишчини уруп өлтүрүш вәқәсидин кейин йүз бәргән тунҗи зор көләмлик уйғур-хитай тоқунушидур.

Игилишимизчә, тоқунушта еғир яриланған бир уйғур тиҗарәтчи дохтурханиға елип берилғандин кейин һаятидин айрилған. Вәқәдә яриланған қалған 6 кишиниң әһвалиниң муқим икәнлики билдүрүлгән болсиму, лекин уларниң уйғур яки хитай икәнлики тилға елинмиди. Хәвәрләрдин мәлум болушичә, даириләр мәхсус дело гурупписи қуруп, вәқәгә четишлиқ гумандарларни издәшкә башлиған. Лекин, сақчи тәрәп из ‏- дерикини қиливатқан гумандарларниң уйғур яки хитай икәнлики мәлум әмәс. Хуйҗу шәһири вә вәқә йүз бәргән җайдики сақчиханилар мухбиримизниң бу вәқә һәққидики соаллириға җаваб беришни рәт қилди.

Бу вәқә наһайити тезла мәркизи германийидики дуня уйғур қурултийиниң диққитини қозғиған. Қурултай баянатчиси дилшат ришит, хитай даирилириниң уйғурларға қаратқан бир тәрәплимилик қарилаш һәрикити хитай пуқралирида уйғурларға қарши кәйпиятни күчәйтип, уйғур-хитай мунасивитиниң изчил җиддийлишишигә түрткә болуватқанлиқини билдүрди. У хитай даирилирини ичкиридики уйғурларниң һаяти, бихәтәрлики вә мал - мүлкигә капаләтлик қилип, уларға тәң баравәр муамилә қилишқа, бу қетимқи вәқәниң һәқиқий әһвалини ашкара елан қилишқа вә өлгүчигә төләм төләп, қатилни җазалашқа чақирди.

Пикирләр (0)
Share
Толуқ бәт