Xitay Uyghur élidiki mekteplerge milletler ittipaqliqi oqushluqini resmiy tarqatti

1 - Séntebir Uyghur élidiki barliq ottura we bashlan'ghuch mektepler yéngi mewsümlük oqush bashlighan küni. Shinxu'a agéntliqining xewiridin melum bolushiche, 5 - iyul ürümchi weqesi yüz bergendin kéyin xitay da'iriliri teripidin tüzülgen milletler ittipaqliqigha da'ir mexsus oqushluq, bügün, yeni 1 - séntebir, Uyghur élidiki mekteplerning yéngi oqush bashlash künige ülgürtüp her bir oqughuchigha tarqitip bérilgen.
Muxbirimiz gülchéhre
2009.09.01

Shinxu'a agéntliqining bu heqte tarqatqan xewiridin ashkarilinishiche, buning bilen ghuljidiki bashlan'ghuch hem ottura mekteplerde oquwatqan 63 ming oqughuchi her heptide mexsus wetenperwerlik we milletler ittipaqliqi terbiyisi namliq mezkur oqushluqni öginidiken.

Xewerlerge qarighanda, bu oqushluq bu yil 6 - ayda tüzülüp bolghan bolsimu 5 - iyul ürümchi weqesidin kéyin da'iriler mezkur oqushluqning mezmunigha özgertish kirgüzüp, 5 - iyul weqesige da'ir mezmunlarghimu mexsus bet ajratqan. Oqushluq siyasiy idiyiwi nezeriye dersidin bashqa, wetenperwerlik hem milletler ittipaqliqi idiyisini emeliy herikitide körsitish telep qilin'ghan ikki xil mezmundin terkip tapidiken.

Mezkur oqushluq xitay ma'arip tarmaqliri teripidin Uyghur élidiki bashlan'ghuch, ottura mekteplerning asasliq penler türige resmiy derslik qilip kirgüzülgen.

Közetküchiler xitay teripidin tüzülgen wetenperwerlik we milletler ittipaqliqi terbiyisi derslikining mekteplerning ders programmilirigha kirgüzülishining, xitayning Uyghur yash ösmürlerge élip bériwatqan siyasiy idiyiwi bésim terbiyisining yenimu kücheytilidighanliqidin dérek béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.