Ösmür mirzahid amanullahning ölüm xewiri Uyghur élide yene bir meydan qattiq zerbe bérishke seweb qilinmaqta
2012.06.05
“Qanunsiz diniy pa'aliyetlerge qet'iy zerbe béreyli” mawzuluq mezkur obzorda, korlida xitay saqchiliri teripidin qiyin-qistaqta öltürülgen mirzahid amanullahning ölüm sewebi burmilap körsitilip, Uyghur élidiki yer asti medrise we muderrisler qalaqliq we zorawanliq bilen eyiblen'gen.
Ozborda yene, diniy telim qanunsiz diniy pa'aliyet, dep tenqid qilinip, uninggha qattiq zerbe bérish teshebbus qilin'ghan.
Uyghur közetküchiler mezkur obzordiki chaqiriqini, Uyghur rayonida, bolupmu korlida dawam qilghusi yene bir meydan qattiq zerbe bérish herikitining bashlinishi, dep qarashmaqta.
Mirzahid amanulllahning ölümi 5-ayning 21-küni yüz bergen. 5-Ayning 23-küni radi'omiz bu heqte xewer bergen. Amérika Uyghurliri birleshmisi 6-ayning 1-küni xitay elchixanisi aldida namayish ötküzüp, mirzahid amanullahning xitay saqchiliri teripidin öltürülüshige naraziliq bildürgen. 15 Kün'giche weqeni axbarattin yoshurup kelgen xitay hökümiti, 6-ayning 4-künige kelgende weqeni tunji qétim xewer qilghan. Nöwette xitay hökümiti chet'eldiki Uyghur teshkilatlirining weqege qarita inkasini qutratquluq bilen eyiblimekte.
Dunya Uyghur qurultiyining bayanatchisi dilshat rishit bügün radiyomizgha bergen bayanatida, xitayning mezkur weqeni 15 kün sir tutushining özila, mirzahid amanullahning xitay saqchiliri teripidin öltürülgenlikining yéterlik ispati, dep körsetti.