Президент обама нюйоркни апәт райони дәп елан қилди

29-Өктәбир америкиниң шәрқий деңиз қирғиқидики нюйорк, нюҗерси, вергинийә, мәрилән қатарлиқ шитатлар сандий намлиқ деңиз борининиң һуҗумиға учриғандин кейин, америка президенти обама нюйоркни апәт райони дәп елан қилип, бу районлардики һөкүмәт вә хәлқни пүтүн күч билән апәттин қутқузуш ишини елип беришқа чақирди.

2012.10.30

Америка метриологийә тармақлириниң билдүрүшичә, дүшәнбә күни нюйоркниң җәнубий қисмидики районларда сандий намлиқ деңиз борини саитигә 200 километирлиқ сүрәттә алға илгирилигән. Апәт еғир болған нюйоркниң манхатон районидики деңиз қирғиқидики су йүзи 4 метирға йеқин өрлигән.

Нюйорк шәһиридики бир қисим кочиларни су бесип кәткән. Америкидики әң чоң шәһәр һесаблинидиған нюйоркта бир милйонға йеқин аһалә токсиз қалған. Шәрқий деңиз қирғиқидики шитатларда тәхминән 6 милйон аһалини вә ширкәтләрни ток билән тәминләш үзүлгән. Апәтниң алдини елиш тәйярлиқ хизмити яхши ишләнгини үчүн, бу қетимқи ямғурлуқ боранниң апити әң төвән дәриҗигә чүшүрүлгән. Сәйшәнбә күни чүштин кейин саәт 1 гә қәдәр өлгән адәм сани 33 кә йәткәнлики мәлум болди.

Сәйшәнбә күни әтигән сандий борини ички қуруқлуқ районлириға йөткилип, шамал күчи саитигә 120 километирға аҗизлиған болсиму, әмма йәнила апәт елип келиш хәвпи еғир болуп, сандий деңиз борини 31-өктәбир чаршәнбә күни канадаға йөткилидикән. Сандий борини йетип келиштин илгири шәрқий деңиз қирғиқидики шитатларда дүшәнбә күни мәктәп, һөкүмәт органлири, сода сарай, ширкәт қатарлиқларда оқуш һәм хизмәт тохтитилди.

Бу қетимқи боран сәвәбидин америка уйғур уюшмисиниң 28-өктәбир йәкшәнбә күни өткүзүш қарар қилинған қурбан һейтлиқ паалийитиму әмәлдин қалдурулған иди. 29-Өктәбир күни тохтитилған аммиви қатнаш 30-өктәбир чүштин кейин саәт 2 дә вашингтон шәһири, верҗинийә вә мәрилән штатлирида әслигә кәлтүрүлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.