ئوباما ئامېرىكىنىڭ ئافغانىستاندا غەلىبە قىلمىغانلىقىنى بىلدۈردى

ئامېرىكا پرېزىدېنتى باراك ئوباما نيۇيورك ۋاقتى گېزىتىنىڭ زىيارىتىنى قوبۇل قىلغاندا، ئامېرىكىنىڭ ئوتتۇرا شەرق سىياسىتى ھەققىدە توختالغان ھەمدە ئامېرىكىنىڭ ئافغانىستاندىكى تالىبانلارغا قارشى ھەرىكىتى ھەققىدە پىكىر بايان قىلىپ، ئامېرىكىنىڭ ئافغانىستاندا غەلىبە قىلمىغانلىقىنى بىلدۈرگەن.
ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭ
2009.03.08

ئامېرىكا ئاۋازىنىڭ خەۋەر قىلىشىچە، پرېزىدېنت ئوباما ئافغانىستاندىكى ۋەزىيەتنىڭ ئىراقتىكى ۋەزىيەت بىلەن پەرقلىق ئىكەنلىكىنى تەكىتلەپ، بۇ يەردىكى قەبىلىلەرنىڭ ھەرخىللىقى ۋە ئۇلارنىڭ ئوخشاش بولمىغان مەقسەتلەر ئۈچۈن ئىش ئېلىپ بارىدىغانلىقىنى، ئافغانىستاندىكى ۋەزىيەتنىڭ ئىراقتىكىگە قارىغاندا تېخىمۇ مۇرەككەپ ئىكەنلىكىنى ئەسكەرتكەن. ئافغانىستان ۋەزىيىتىنىڭ مۇرەككەپلىكى تۈپەيلىدىن ئوباما ھۆكۈمىتى ئۆتكەن ئايدا ئافغانىستانغا يەنە 17 مىڭ كىشىلىك قوشۇن ئەۋەتىدىغانلىقىنى جاكارلىغان ئىدى.

ئوباما سۆزىدە يەنە ئامېرىكا ھۆكۈمىتىنىڭ ئافغانىستان مەسىلىسىگە ئائىت يېڭى سىياسەت يۈرگۈزۈشى مۇمكىنلىكىدىن سىگنال بەرگەن بولۇپ، بۇ مۇناسىۋەت بىلەن ئافغانىستان پرېزىدېنتى خامىد كارزاي ئوباما ھۆكۈمىتىنىڭ تالىبانلارنىڭ مۆتىدىللىرى بىلەن سوھبەتلىشىشىنى قارشى ئالىدىغانلىقىنى، ئۆزىنىڭمۇ بۇنداق سۆھبەتنى داۋاملاشتۇرغانلىقىنى بىلدۈرگەن.

شەنبە كۈنى ئامېرىكا تاشقى ئىشلار مىنىستىرى ھېللارىي كلىنتون تۈركىيىنى زىيارەت قىلىپ، تۈركىيە باش مىنىستىرى ئەردوغان ۋە تاشقى ئىشلار مىنىستىرى باباجان بىلەن كۆرۈشكەن، ئۇ سۆزىدە تۈركىيىنىڭ ئامېرىكا ئۈچۈن مۇھىملىقىنى تەكىتلىدى شۇنىڭدەك كېلەر ئايدا پرېزىدېنت ئوبامانىڭ تۈركىيىنى زىيارەت قىلىدىغانلىقىنى بىلدۈرگەن. ھېللارىي كلىنتوننىڭ تۈركىيە زىيارىتى تۈرلۈك ئىنكاسلارنى كەلتۈرۈپ چىقاردى شۇنىڭدەك ئامېرىكىنىڭ ئوتتۇرا شەرق سىياسىتىدە تۈركىيىنىڭ مۇھىم رول ئوينايدىغانلىقىنى نامايەن قىلدى.

ﻣﯘﻧﺎﺳﯩﯟﻩﺗﻠﯩﻚ ﺧﻪﯞﻩﺭﻟﻪﺭ
قىسقا خەۋەرلەر
پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.