خىتاي ئۇيغۇر ئېلىدىكى ' قوش تىل' يەسلىلىرىنى يەنە كۆپەيتمەكچى

شىنخۇا ئاخباراتىدا كۆرسىتىلىشىچە، ئۇيغۇر ئاپتونوم رايونلۇق پارتكومىنىڭ دائىمىي ھەيئەت ئەزاسى ئەركىنجان تۇراخۇن ئۈرۈمچىدە چاقىرىلغان 2009 - يىللىق قوش تىل مائارىپ يىغىنىدا " قوش تىل " يەسلىسى قۇرۇلۇشىنىڭ مىللەتلەر ئىتتىپاقلىقىنى ئىلگىرى سۈرىدىغانلىقى ۋە مائارىپ سىستېمىسىنىڭ مۇقىملىقىنى قوغداش خىزمەت ئەمەلىيىتىگە ماس كېلىدىغانلىقىنى بىلدۈرگەن.

خەۋەردە كۆرسىتىلىشىچە، ئۇيغۇرلار توپلىشىپ ئولتۇراقلاشقان رايونلارغا 2009 - يىلى يېڭىدىن قۇرۇلىدىغان "قوش تىل" يەسلىلىرىگە 830 مىليون خىتاي پۇلى ئاجرىتىلغان بولۇپ، مەبلەغ بۇلتۇرقى 200 مىليون يۈەندىن بىر نەچچە ھەسسە ئاشۇرۇلغان.
 
مەلۇم بولۇشىچە، ئۆتكەن يىلى ئاقسۇ، قەشقەر ۋە خوتەن قاتارلىق رايونلاردا 214 "قوش تىل" يەسلىسى قۇرۇلغان بولۇپ، بۇلار بۇ يىل 8 - ئايدىن باشلاپ ئىشقا كىرىشتۈرۈلىدىكەن.