Xitay amérikining tyen'enmin weqeside ziyankeshlikke uchrighuchilargha da'ir tepsiliy ehwalni ashkarilash chaqirini ret qildi

Amérika dölet ishlar ministirliqi mu'awin bayanatchisi mark tonér, tyen'enmin weqesining 22 yilliqi munasiwiti bilen bayanat élan qilip, xitay hökümitini 1989‏-yilidiki namayishqa qatniship hazirgha qeder türmide yétiwatqan barliq mehbuslarni qoyup bérishke chaqirghan.

U “Biz xitay hökümitining öltürülgen, tutqun qilin'ghan we iz-déreksiz yoqap ketkenlerge da'ir tepsiliy ehwallarni toluq élan qilishqa chaqirimiz” dégen idi. Lékin xitay tashqi ishlar ministirliqi bayanatchisi léy xung aldinqi küni shinxu'a axbarat agéntliqi arqiliq amérikining chaqiriqigha inkas qayturup, amérikining chaqiriqini “Junggo hökümitige qaritilghan asassiz tenqid” dep körsetken.

Xitay hökümiti amérikining chaqiriqini ret qilghan bolsimu, lékin uning weqede perzentliri ziyankeshlikke uchrighan a'ililerge tölem töleshni tewsiye qilghanliqi, biraq ularning erz‏-shikayettin waz kéchishi telep qilin'ghanliqi xewer qilin'ghan idi.

Léy xung bayanatida bu mesilini tilgha almighan shundaqla u yene, “Biz amérika terepni siyasiy bir tereplimilik we amérika-junggo munasiwitining asasi éqimigha xilap xata heriketlerde bolushtin waz kéchishke chaqirimiz” dégen.

Shu küni yene teywen prézidénti ma yingjyu bayanat élan qilip, xitayni siyasiy islahat élip bérishqa chaqirghan idi. U “Biz junggo chong quruqluq da'irilirining siyasiy islahat élip bérip, erkinlik, démokratiye, kishilik hoquq we qanun bilen bashqurushni yolgha qoyushini jiddiy ümid qilimiz” dep tekitligen.