5-Июл үрүмчи вәқәсиниң 2 йиллиқида дуня уйғур қурултийи қатарлиқ хәлқара тәшкилатлар баянат елан қилип хитай һөкүмитини тәнқидлиди

2009-Йили үрүмчидә йүз бәргән 5-июл үрүмчи вәқәсиниң 2 ‏йиллиқида, дуня уйғур қурултийи, хәлқара уйғур кишилик һоқуқ фонди җәмийити қатарлиқ уйғур тәшкилатлири һәм бирләшкән дөләтләр тәшкилатиниң хәлқара кишилик һоқуқ тәшкилати қатарлиқ хәлқара тәшкилатлар өз тор бәтлири һәм хәлқара мәтбуатларда баянат елан қилип, 2 йилдин буян хитай һөкүмити көрүнүштә уйғурларға қарита юмшақ сиясәт йүргүзгәндәк көрүнгән болсиму, әмма уйғурлар вәзийитидә һечқандақ яхшилиниш болмиғанлиқини илгири сүрди.
Мухбиримиз меһрибан
2011-07-05
Share

Дуня уйғур қурултийи баянатчиси дилшат ришит хәлқара мәтбуатлардин ройтерс агентлиқи, бирләшмә агентлиқ, б б с агентлиқи қатарлиқ 11 агентлиққа бирла вақитта синалғуда баянат берип, 2 йилдин буянқи уйғур вәзийити һәм хитай һөкүмитиниң шәрқий түркистанда давамлаштуруватқан бастуруш сияситини тәнқидлиди.

Дилшат ришит өз баянатида йәнә ғәрб дөләтлири һәм хәлқара кишилик һоқуқ тәшкилатлирини 5-июл үрүмчи вәқәсидә һәм униңдин кейинки 7-июл, 3-сентәбир күнлиридики хитайларниң калтәк көтүрүп уйғурларни уруп яриландуруш вәқәлиридә хитайлар тәрипидин уруп өлтүрүлгән һәм вәқәдин кейин сақчилар тәрипидин тутқун қилинип, һазирғичә из ‏-дерики болмиған уйғурларниң санини дуняға елан қилиш һәққидә хитайға давамлиқ бесим ишлитишкә чақирди.

Хитай һөкүмити 5-июл үрүмчи вәқәсидин кейин, райондики вәзийәтни пәсәйтиш үчүн, уйғур аптоном районида қаттиқ қол сиясәт йүргүзүш билән, райондики хәлқниң наразилиқиға учриған уйғур аптоном райониниң партком секретари ваң лечүәнни вәзиписидин қалдуруп, униң орниға җаң чүншәнни партком секретари қилип тәйинлигән иди. Шундақла шинҗаңға ярдәм бериш, йәрлик хәлқниң турмушини яхшилаш намида, хитайниң 19 өлкисиниң уйғур районида мәбләғ селишни тезлитип, техиму көп хитай көчмәнлириниң районға көчмән болуп йәрлишишини кәлтүрүп чиқарған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт