Amérika dölet mejlisi ezasi simit, Uyghur ayallirining erkin tughushigha yol qoyushni telep qildi

Amérika dölet mejlisi ezasi kristofir simit xitayning Uyghurlargha qaratqan pilanliq tughut siyasitini tenqidlep, ghulja shehirining dadamtu yézisidiki Uyghur déhqan ayali arzugul tursunning bowiqining salamet tughulghanliqini, lékin bashqa ayallarningmu arzugul tursun'gha oxshash mu'amilidin behriman bolushini telep qildi.
Muxbirimiz erkin
2009-05-22
Share

Kristofir simit bu sözlerni peyshenbe küni dunya Uyghur qurultiyining amérika dölet mejliside chaqirilghan 3 - nöwetlik yighinida söz qilghanda tekitligen. Uning éytishiche, arzugul tursunning bowiqi salamet tughulghandin kéyin u xitayning washin'gtondiki bash elchisi jaw wénjunggha téléfon qilip, uning bu weqege jiddiy qarighanliqidin memnuniyet hés qilghanliqini, lékin bu türdiki mu'amilidin bashqa ayallarmu behriman bolushi kérek dep qaraydighanliqini tekitligen.

Kristofir simit mundaq deydu": men xitay elchisi jawgha téléfon qilip, uninggha rehmet éyttim, lékin bizning buningdinmu köp ishlarni körüshni xalaydighanliqimizni bildürdum.

Ghulja shehirining dadamtu yézisida olturushluq arzugul tursun 2008 - yili 3 ‏- perzentige hamildar idi. Lékin yéziliq hökümet hamilini éliwétishni telep qilip, 11 - ayda uni sheherlik su darwaza doxturxanisigha élip barghan.

Bu weqe chet'el metbu'atlirida élan qilin'ghandin kéyin, amérika dölet mejlisi ezalirining diqqitini qozghighan. Kristofir simit, xitay elchisi jaw wénjung bilen alaqiliship, arzugulning balisini qutquzuwélishni telep qilghan idi. Kristofir simit, qurultayda bu weqeni alahide tilgha aldi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet