Xitay tashqi ishlar ministiri yang jyéchi ereb-xitay hemkarliq munbiri yighinida küchlük bésimgha uchrighan

Roytérs agéntliqining 31‏-may xewer qilishiche, ereb elliri emeldarliri xitayning öz tesir küchini ishlitip, süriye hökümitige bésim ishlitishi, süriyide zorawanliq weqelirining dawamliq yüz bérishini tosushni telep qilghan. Yighinda kuweyt tashqi ishlar ministiri sheyx sabax xalid el-sabax eskertip: xitayning süriyide zorawanliq we adem ölüsh weqelirining dawamliq kéngiyishini tosushqa hessilep küch chiqirishini ümid qilimiz, dégen.

Tunis prézidénti manséf marzoqi eskertip: xitay süriye xelqining azab-oqubettin qutulushigha yardem qilishi kérek, dégen. U yene agahlandurup, eger süriyige héchqandaq heriket qollanmisa, buning herbiy arilishishni keltürüp chiqiridighanliqini bildürgen.

Xitay bilen rusiye b d t xewpsizlik kéngishining süriye prézidénti bashar el-esedke émbargo qoyush pilanigha qarshi chiqqan. Bu munasiwet bilen yéqinda süriyining xowla shehiride yüz bergen qirghinchiliq xelq'ara jem'iyetning xitay bilen rusiyige bolghan naraziliqini ilgirilep kücheytiwetken idi.

Amérika dölet ishlar ministiri hilariy klinton xanim tünügün rusiye bilen xitayni tenqidlep, bolupmu rusiyining pozitsiyisi süriyide ichki urush partlishigha türtke boluwatqanliqini ilgiri sürgen. U yene, süriyige herbiy mudaxile qilish éhtimalliqi barghanséri küchiyiwatqanliqini tekitligen. Lékin yang jyéchi ereb-xitay hemkarliq munbiri yighinida qilghan sözide süriye mesilisini tilgha almighan.