Б д т хитайниң бовақлар сүт парашук вәқәсини үзүл - кесил тәкшүрүшини үмид қилди

Б д т ниң сәһийә органи билән балилар фонди тәшкилати пәйшәнбә күни қошма баянат елан қилип, хитайниң бовақлар сүт парашуки вәқәсидин чоңқур азабланғанлиқини вә әндишә туюватқанлиқини, хитай даирилириниң вәқә үстидин үзүл кесил тәкшүрүш елип беришини үмид қилди.
Мухбиримиз әркин
2008.09.26

Юқириқи икки органниң хитайдики иш башқармиси пәйшәнбә күни елан қилған баянатта бовақларниң сүт парашукиға зиянлиқ мадда арилаштуруш "кишини йиргәндүридиған" вәқә, дәп тәкитлигән. Баянатта йәнә хитай даирилириниң вәқә үстидин үзүл - кесил тәкшүрүш елип беришиға ишинидиғанлиқи, лекин тәкшүрүштин кейин йемәкликләр бихәтәрликигә диққәт қилишни, балилар йемәкликләр қаидисиниң техиму қаттиқ йолға қоюлушини үмид қилидиғанлиқини билдүргән.

Америка мәтбуатлириниң хәвәр қилишичә, б д т балилар фонди тәшкилати баянатчиси дейл рустейн қошма баянатниң мәқсити аниларға бовақларни ана сүти билән беқишниң муһимлиқини әскәртиш, дәп тәкитлигән. Хитайда сүтлүк йемәкликләргә меламин арилаштуруш вәқәсиниң четилиш даириси үзлүксиз кеңәймәктә. Җүмә күни шаңхәй гуаңмиң йемәкликләр ширкити баянат елан қилип, меламин түпәйли " тошқан" маркилиқ кәмпүтни ишләпчиқириш тохтитилғанлиқини билдүргән.

Йеңи зелландийә, австиралийә, сингапор, канада, әнгилийә, тәйвән вә хоңкоңлар " тошқан" кәмпүт сетишни тохтатқан. Буниңдин сәл бурун явропа иттипақи хитай сүт мәһсулатлирини импорт қилишни чәклигән иди. Қошма баянатта йәнә, йимәклик карханилириниң хәлқ аммисини алдаш қилмишиниң қобул қилинмайдиғанлиқи, балилар йемәкликини булғашниң техиму қаттиқ әйиблинишкә тегишлик қилмиш һесаблинидиғанлиқини тәкитләнгән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.