Aqsu ayköldiki “Qattiq zerbe bérish” te bir a'ilidin ikki jan hayatidin ayrilghan, ikkisi türmige tashlan'ghan

Muxbirimiz shöhret hoshur
2016.02.25
Share on WhatsApp
Share on WhatsApp
qattiq-zerbe-berish-saqchi-tutqun.jpg Xitayning térror we diniy ashqunluqqa zerbe bérish herikitidin körünüsh.
CCTV

Ayköl peyshenbe bazardiki siyasiy tutqunlar (5)

Anglighuchilirimizdin biri bügün muxbirimizgha mektup yollap, aldinqi yili Uyghur rayonida dawam qilghan qattiq zerbe bérish dolqunida aqsu ayköldiki bir a'ilidin 2 kishining hayatidin ayrilghanliqini, ikki kishining bolsa türmige tashlan'ghanliqini pash qildi. Muxbirimiz ayköl saqchixanisigha téléfon qilghinida, saqchi xadimi ehwal heqqide melumat bérishni ret qilghan bolsimu, emma shundaq bir paji'ening tewelikte yüz bergenlikini inkar qilmidi. Muxbirimiz yene hökümet xadimliri teminligen alaqe uchurigha asasen, mezkur a'ilide 5 nareside bala bilen yar-yöleksiz qalghan charisiz ana xasiyet xanim bilen körüshkinide, mektupta déyilgen uchurning toghriliqini delillidi.

Mektupta bayan qilinishiche, aykölning peyshenbe bazirida olturushluq ahaliliridin tursun mamut we 17 yashliq oghli ablikim tursun qanunsiz diniy pa'aliyetler bilen shughullinish bilen eyiblinip türmige tashlan'ghan.

Xette déyilishiche, tursun mamut yette yilliq késilgen, emma ablikim tursunning ösmürler türmiside ikenliki tilgha élin'ghan bolsimu, qanche yil késilgenliki tilgha élinmighan.

Mektuptin melum bolushiche, tursun mamut bilen oghli ablikim tursun üstidin 2015‏- yil béshida sot échilghan, sotta bu ata-balining mehellidiki bir türküm kishiler bilen birlikte, meschit sirtida topliship namaz oqughanliqi qanunsiz diniy pa'aliyetke pakit qilip körsitilgen. Sotta ularning adwokati bolmighan.

Mektupta yene déyilishiche, tursun mamut we oghlining tutqun qilinishi, ulardin héchqandaq uchur élinalmasliq qatarliq ehwallar, tursun mamutning éghir'ayagh qizi xeyrigülning salametlikige éghir tesir körsetken. Tursun mamutning soti échilip bir heptidin kéyin, qizi xeyrigül öyide tughutta wapat bolghan. Buninggha uni a'ilide doxturxanigha apiridighan er kishi bolmasliq asasliq seweb bolghan. Buningdin yene bir hepte kéyin, mehbus tursun mamutning 5 yashliq newrisimu ushtumtut aghrip dawalitishqa ülgürmey hayatidin ayrilghan.

Biz mektuptiki bu uchurning toghriliqini delillesh üchün ayköl bazarliq saqchixanigha téléfon qilduq. Saqchi xadimi weqe heqqide melumat bermigen bolsimu, emma tewelikte mushundaq bir a'ile paji'esi yüz bergenlikini inkar qilmidi.

Biz arqidin ayköl bazarliq hökümet we kent ahaliler komitétigha téléfon qilip, mezkur a'ilidiki charisiz ana xasiyet xanimning téléfonigha érishtuq. Xasiyet xanim mektupta yézilghanlarning toghriliqini delillidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.