D u q ning 6-qurultiyida aliy rehber, re'is we mu'awin re'isler saylap chiqildi

Ixtiyariy muxbirimiz ekrem
2017-11-13
Élxet
Pikir
Share
Print
D u q 6-nöwetlik wekiller qurultiyida (soldin onggha) d u q ning re'isi dolqun eysa ependi bilen d u q ijra'iye komitétining re'is ömer qanat ependi xatire sürette. 2017-Yili 11-noyabir, gérmaniye.
D u q 6-nöwetlik wekiller qurultiyida (soldin onggha) d u q ning re'isi dolqun eysa ependi bilen d u q ijra'iye komitétining re'is ömer qanat ependi xatire sürette. 2017-Yili 11-noyabir, gérmaniye.
RFA/Ekrem

D u q 6-nöwetlik wekiller qurultiyida rabiye qadir xanim d u q ning aliy rehbiri, dolqun eysa ependi re'is bolup saylandi.

11-Noyabir d u q ning yéngidin tüzitish kirgüzülgen nizamnamisi birge qarshi yüzdin artuq awazning maqulluqi bilen testiqlan'ghandin kéyin, qurultayning omumiy saylimi élip bérildi.

10-Noyabir bashlan'ghan bu yighinda, d u q ning sabiq re'isi rabiye qadir xanimning qurultay da'imiy komitétining qararigha bina'en aliy rehber bolup saylan'ghanliqi élan qilindi. 11-Noyabir saylamdin ilgiri, re'islik namzati bolghan dolqun eysa ependi bilen ömer qanat ependiler re'islikke saylan'ghandin kéyin qilmaqchi bolghan ishliri heqqide nutuqlar sözlidi.

Démokratik usulda bélet tashlap saylash netijiside, d u q bash katipi, wakaletsiz milletler teshkilatining mu'awin re'isi dolqun eysa ependi 21 ge qarshi 78 awaz bilen ömer qanat ependini yéngip, d u q qurultiyining re'islikige saylandi. Saylam netijisi élan qilin'ghanda, zal ichini güldüras alqish sadaliri qaplidi. Kishiler bu qétimqi saylamning netijisige bolghan razimenliklirini ipadileshti.

Qazaqistandin kelgen közetküchilerdin qehriman ghojamberdi ependi yighin heqqide ziyaritimizni qobul qilghanda, bu qétimqi qurultayning ehmiyetke ige yighin bolghanliqini hemde bu saylamning netijisige ümid bilen qaraydighanliqini tilgha alghan idi.

Re'islik saylimidin kéyin mu'awin re'isi we ijra'iye komitéti re'isliri saylap chiqildi. Qurultay terkibidiki 20 artuq komitétlarning mes'ullirimu bélet tashlash usuli arqiliq saylandi. Türkiye hajetepe uniwérsitétining oqutquchisi, istratégiye mutexessisi doktor erkin ekrem we gérmaniyediki siyasiy pa'aliyetchi perhat muhemmidi ependiler mu'awin re'islikke saylandi. Amérikadin kelgen ömer qanat ependi qurultay ijra'iye komitétigha re'is boldi.

6-Nöwetlik d u q yighinigha 19 dölettin kelgen 140 etrapida resmiy wekil, közetküchi we méhman qatnashqan idi. Qazaqistandin kelgen Uyghur moysipitliridin riza semidi ependimu 6-nöwetlik wekiller qurultiyigha yüksek baha berdi. Türkiyedin kelgen Uyghur moysipitliridin hamutxan köktürk ependimu yighinning démokratik prinsiplargha emel qilghan, tertiplik, intizamliq bir shekilde nahayiti hayajanliq ötkenlikini tekitlidi.

D u q ning bu qétimqi démokratik saylimi netijiside 27 neper wekil qurultayning herqaysi komitétlirigha wezipilerge teyinlinish bilen birge, herbir komitét mudirigha öz terkibige eza qobul qilish hoquqi bérildi we komitétlarning 6 ayliq xizmet pilanlirini tüzüp chiqish wezipisi tapshuruldi.

Toluq bet