D u q türk teshkilatliri bilen jaza lagérlirigha qarshi hemkarliq ornatmaqta

Ixtiyariy muxbirimiz ekrem
2019-02-20
Share
duq-rehberliri-Xelqara-turk-demokratlar-birliki-xadimliri-1.jpg D u q rehberliri "Xelq'ara türk démokratlar birliki" xadimliri bilen söhbette. 2019-Yili 19-féwral, gérmaniye.
RFA/ekrem

Dunya Uyghur qurultiyining rehberliri gérmaniyening köln, frankfurt, nürnbérg qatarliq sheherliridiki türk teshkilatlirining bash shitablirini ziyaret qildi.

19-Féwraldin bashlap d u q rehberliri gérmaniyening bir qanche chong sheherliridiki türk teshkilatlirining bash shitabini ziyaret qilip, xitayning Uyghur diyarida tesis qilghan jaza lagérlirigha qarshi ortaq heriket qozghash ishlirida öz-ara hemkarliqlar ornatqan.

18-Féwral amérikidiki bir heptilik ziyaritini axirlashturup myunxén shehirige qaytip kelgen d u q re'isi dolqun eysa ependi, 19-féwraldin étibaren gérmaniyening herqaysi jayliridiki türk teshkilatliri bilen hemkarliq ornitish meqsitide pa'aliyitini bashliwetken.

Gérmaniyening köln shehiridin ziyaritimizni qobul qilghan d u q re'isi dolqun eysa ependi tunji bolup merkizi kölnde bolghan "Xelq'ara türk démokratlar birliki" ni ziyaret qilghanliqini hemde mezkur teshkilatning re'isi bülent bilgi ependi bilen söhbetler ötküzüp, aldimizdiki aylarda gérmaniye teweside xitayning jaza lagérlirigha qarshi birlikte pa'aliyetler uyushturush toghrisida pikir birliki hasil qilghanliqini tilgha aldi.

Bu qétimqi pa'aliyette d u q re'isi dolqun eysa ependige qurultay diniy ishlar komitétining mudiri, "Sherqiy türkistan ölimalar birliki" ning mu'awin re'isi turghunjan alawudun we qurultay fondining mudiri abdujélil emet ependilermu hemrah bolup barghan.

Turghunjan alawudun ependi "Xelq'ara türk démokratlar birliki" din bashqa yene bu ikki künde gérmaniyening bashqa sheherliridiki bir qisim tesiri zor türk teshkilatliri bilenmu söhbetler élip bérilghanliqini bildürdi.

Qurultay fondining mudiri abdujélil emet ependi bu qétimqi ziyarette asasliqi xitayning Uyghurlar üstidin yürgüzüwatqan zulum siyasetlirige, bolupmu jaza lagérlirigha qarshi türk teshkilatliri bilen ish birliki qurushning muhim meqset qilin'ghanliqini ilgiri sürdi.

D u q rehberlirining bu qétimqi ziyariti heqqide toxtalghan dolqun eysa ependi aldimizdiki aylarda türk we bashqa islam elliri xelqliri bilen hemkarliship, pütün dunya miqyasida xitaygha qarshi zor heriket dolquni qozghaydighanliqini, buning üchün "Sherqiy türkistan hemkarliq munbiri" qurush xizmitining jiddiy dawam qiliwatqanliqini tekitlidi.

D u q rehberlirining bildürüshiche, aldimizdiki 3-aylarda türk we bashqa islam teshkilatliri, kishilik hoquq organlirining hemkarliqida b d t hemde yawropa ittipaqining merkizide shundaqla 4-aylarda yene washin'gtonda kölimi zor bolghan namayishlar uyushturulidiken. Dunyaning oxshimaydighan elliride yene xitaygha qarshi her türlük ilmiy muhakime yighinliri ötküzülidiken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet