D u q re'isi dolqun eysa yaponiye taratqulirining teshwiqat nishani bolmaqta

Yaponiye Uyghur jem'iyiti d u q re'isi dolqun eysaning doklat bérish yighini toghrisida chiqarghan uqturush. 2018-Yili 20-noyabir, tokyo.

Yaponiye axbarat wasitilirining diqqiti Uyghurlar mesilisige merkezleshmekte.

19-Noyabir yaponiye ziyaritini bashlighan dunya Uyghur qurultiyining re'isi dolqun eysa ependi 20-noyabir yaponiye döletlik axbarat kulubida muxbirlarni kütüwélish yighini ötküzüp, Uyghurlarning nöwettiki éghir weziyitidin melumat bergen. Buning bilen yaponiyediki köpligen dangliq axbarat wasitiliri ikki kündin buyan dolqun eysaning pikirlirini chöridigen halda Uyghurlar mesilisini keng teshwiq qilishqa bashlighan.

Yaponiye Uyghur jem'iyitining re'isi, d u q ning yaponiyediki wekili ilham mehmut ependining bildürüshiche, 20-noyabir kechte yene yaponiyediki bezi axbarat wasitiliri we kishilik hoquq jem'iyetlirining uyushturushi bilen Uyghurlar mesilisige qiziqquchi yapon xelqige “Sherqiy türkistanning nöwettiki weziyiti toghrisida melumat bérish” pa'aliyiti bolup ötken. Pa'aliyetke köp sanda kishi qatnashqan we Uyghurlar toghrisida türlük so'allarni sorashqan. Bu pa'aliyetning xewiri ijtima'iy taratqularda keng teshwiq qilin'ghan.

Bügün, yeni 21-noyabir küni dolqun eysa ependi yene yaponiyediki meshhur taratqularning ziyaretlirini qobul qilip, Uyghurlar mesilisi, jümlidin jaza lagérliri mesilisini etrapliq anglatqan. Ilham mehmut ependi bu heqte toxtalghanda yaponiye siyasetchiliri we obzorchiliri qiziqidighan bügünki bu téléwiziye programmisining yaponiyede küchlük inkas qozghash mumkinlikini tilgha aldi.

D u q re'isi dolqun eysa ependining bildürüshiche, bügün yene yaponiye xelqige Uyghurlar mesilisini anglitish üchün mexsus doklat bérish yighini uyushturulghan. Yighinda yaponiye xelqining seperwerlikke kélip yaponiye hökümitini Uyghur diyaridiki jaza lagérliri mesilisige köngül bölüshke qistash telep qilin'ghan.

D u q re'isining bu 2 kün ichidiki pa'aliyetliri yaponiye axbarat wasitiliri we gherb metbu'atlirida keng tarqilipla qalmay, türlük ijtima'iy taratqularda diqqet chekküchi bir téma süpitide teshwiq qilinishqa bashlighan.

D u q ning mu'awin re'isi perhat muhemmidi ependi d u q re'isi dolqun eysa ependining yaponiye ziyariti toghrisida toxtalghanda yaponiyening Uyghur dewasi üchün nahayiti muhimliqini we yaponiye hakimiyet qatlimida jaza lagérliri mesilisini küntertipke keltürüshning zörüriyetlirini tilgha aldi.

D u q re'isi aldimizdiki künlerde yaponiyede yene bezi muhim siyasiy hem ijtima'iy pa'aliyetlerni élip baridiken. Yaponiyening muhim dölet erbabliri bilen ayrim uchriship, Uyghurlar we jaza lagérliri mesilisining yaponiyedimu qiziq nuqtigha aylinishi üchün küch serp qilidiken.