Д у қ рәһбәрлири явропа парламентидики зияритини давам қилмақта

Ихтиярий мухбиримиз әкрәм
2018-03-22
Елхәт
Пикир
Share
Принт
Д у қ рәиси долқун әйса вә иҗраийә комитети рәиси өмәр қанат әпәндиләр явропа парламенти алдида. 2018-Йили 19-март, бирюссел белгийә.
Д у қ рәиси долқун әйса вә иҗраийә комитети рәиси өмәр қанат әпәндиләр явропа парламенти алдида. 2018-Йили 19-март, бирюссел белгийә.
RFA/Ekrem

Дуня уйғур қурултийиниң рәһбәрлири белгийә пайтәхти бирюсселдики явропа парламентида елип бериватқан зиярәтлирини давам қилмақта.

Норвегийә пайтәхти ослодики «нобел әркинлик сарийи» да өткүзүлгән илмий муһакимә йиғини һәмдә уйғур яшлирини демократийә, кишилик һоқуқ вә қануний билимләр билән тәрбийәләш курси қатарлиқ бир йүрүш паалийәтлирини 18-март күни ахирлаштурған д у қ ниң рәиси долқун әйса вә қурултай иҗраийә комитетиниң рәиси өмәр қанат әпәндиләр 19-март күни белгийә пайтәхти бирюсселға йетип келип, явропа парламентида елип баридиған 5 күнлүк зияритини рәсмий башлиди.

Д у қ ниң рәиси долқун әйса вә қурултай иҗраийә комитетиниң рәиси өмәр қанат әпәндиләрниң бүгүн бирюсселдин бәргән мәлуматиға асасланғанда, улар 20-марттин башлап явропа парламентиниң бир қисим әзалири билән көрүшкән һәмдә явропа парламентида 2017-йили 19 -өктәбирдә қурулған «уйғур достлуқ гурупписи» ниң әзалири билән сөһбәтләр елип барған. Улар билән уйғурларниң нөвәттики вәзийити һәққидә сөзлишишләр өткүзгән.

Д у қ иҗраийә комитетиниң рәиси өмәр қанат әпәндиниң билдүрүшичә, улар парламент әзалири билән учришиш елип бериш билән биргә белгийәдики уйғур җамаити биләнму сөһбәтләр өткүзүп, 4-айниң 27-күни явропа иттипақиниң мәркизидә елип баридиған 5 миң кишилик намайишниң сәпәрвәрлики хизмәтлирини қанат яйдурған.

Долқун әйса әпәнди, бу қетим явропа парламентида елип бериватқан зиярәтлири давамида парламент әзалири билән келәчәктә қилмақчи болған бәзи хизмәтләрниң пилан-программилирини түзгәнликини әскәртти.

Өмәр қанат әпәндиниң баян қилишичә, қурултай рәһбәрлири икки күндин буян явропа парламентидики «уйғур достлуқ гурупписи» ниң башлиқи илхан күчүк әпәнди қатарлиқ кишиләр билән айрим-айрим сөһбәтләр өткүзүп, уйғурларниң нөвәттики вәзийитини аңлатқан һәмдә 27-апрелдики намайиш мәсилисини ортақ музакирә қилған.

Долқун әйса әпәндиниң явропа парламентида елип баридиған паалийәтлири йәнә 3 күн давамлишидиған болуп, у алдимиздики күнләрдә явропа парламентиниң йәнә бир қисим әзалири билән учришишлар өткүзидикән. Мәлум болғинидәк, д у қ ниң рәиси долқун әйса әпәнди өз нөвитидә йәнә вәкаләтсиз милләтләр тәшкилатиниң муавин рәиси болуп, 23- вә 24-март күнлири у бирюсселда чақирилидиған вәкаләтсиз милләтләр тәшкилати (UNPO) ниң иҗраийә комитети йиғиниға қатнишидикән. Униңдин башқа, 27-апрел өткүзүлидиған бирюсселдики 5 миң кишилик намайишниң тәйярлиқ хизмәтлири билән мәшғул болидикән.

Өмәр қанат әпәндиниң әскәртишичә, 4-айниң 26-күни явропа парламентида уйғур елидики «тәрбийәләш мәркизи» дәп аталған җаза лагерлири һәққидә мәхсус илмий муһакимә йиғини өткүзүлидиған болуп, бу йиғинға көп сандики парламент әзалири иштирак қилидикән.

Д у қ рәһбәрлири явропа парламентидики зиярәтлири давамида вакаләтсиз милләтләр тәшкилатиниң бирюсселдики баш штабини зиярәт қилған һәмдә нөвәттә йолға қойидиған паалийәтләр тоғрисида улар билән музакириләр елип барған.

Д у қ рәһбәрлириниң билдүрүшичә, алдимиздики айда белгийә пайтәхти бирюсселда д у қ иҗраийә комитетиниң кеңәйтилгән йиғини, «3-нөвәтлик шәрқий түркистан истратегийә муһакимә йиғини», «шәрқий түркистандики йиғивелиш лагерлири һәққидә доклат бериш йиғини» һәмдә 27-апрелдики 5 миң кишилик намайиштин ибарәт 4 чоң паалийәт өткүзүлидикән. Уларниң бу қетимқи бирюссел зиярити мушу 4 йиғинниң тәйярлиқ хизмәтлирини толуқ тамамлашниму муһим бир мәқсәт қилған икән. Болупму 27-апрел явропа парламенти алдида өткүзүлидиған уйғурларниң 5 миң кишилик зор намайишиға алдин тәйярлиқ қилиш иши уларниң бу қетимқи бирюссел зияритиниң муһим күнтәртиплиридин бир икән.

Пикирләр (0)
Share
Толуқ бәт