Мисирдин юртиға қайтқан оқуғучи илһам қариму йиғивелиш лагерида җан үзгән

Алдинқи күни аңлиғучилиримиздин бири радийомизға инкас йоллап, мисирдин юртиға қайтқан оқуғучилардин 28 яшлиқ илһам қари мәмәтҗанниң йиғивелиш лагерида җан үзгәнликини мәлум қилған иди. Мухбиримизниң илһам қариниң юрти болған атушниң азақ йезисиға қарита елип барған телефон зиярәтлири давамида мәзкур учурниң тоғрилиқи сақчи хадимлири тәрипидин дәлилләнди.

Радиомизға кәлгән мәзкур инкаста атушниң азақ йеза бөгән кәнтидики мөтивәр затлардин обулһәсән һаҗиниң нәвриси илһам қари мәмәтҗанниң 2016 ‏-йили юртиға қайтқанлиқи вә бир мәһәл нәзәрбәнд қилинғандин кейин йиғивелинип лагериға әкетилгәнлики, бултур йәни 2017‏-йили йилниң ахирида униң җәситиниң аилисигә тапшурулғанлиқи баян қилинған. Биз бу учурниң тоғра-хаталиқини ениқлаш үчүн алди билән атуш шәһәрлик җ х қоманданлиқ мәркизигә телефон қилдуқ.

Мәзкур инкаста илһам қари мәмәтҗанниң мисирда оқуватқан вақитлирида юртиға қайтип хизмәт қилиш нийитидә сиясий мәзмундики сөз-һәрикәтләрдин өзини узақ тутқанлиқи, әмма униң ата-аниси хитай сақчилири тәрипидин атушта гөрүгә елинивалғандин кейин униң оқушини ташлап юртиға қайтқанлиқи тилға елинған. Биз атуш шәһәрлик җ х қоманданлиқ мәркизигә қайта телефон қилғинимизда илһам қари һәққидә мәлумат берәлмәйдиғанлиқини ейтти.

Мәзкур инкаста йәнә илһам қариниң мисирдики вақтида өйләнгәнлики вә икки пәрзәнти барлиқи тилға елинған, әмма аял-балилириниң нәдә икәнлики әскәртилмигән. Атушниң азақ йезилиқ сақчиханисиға телефон қилғинимизда дәсләптә сақчилар бу һәқтә мәлумат бериштин өзини қачурди. Биз сақчи хадимлириниң мисирдин қайтқан вә лагерда җан үзгән илһам қариниң мәһәллә тәвәликини сориғинимизда униң азақниң бөгән кәнтидин икәнликини тилға алди. Сақчи хадими илһам қариниң өлүм хәвирини юқири орунлардин соришимиз керәкликини баян қилди, у сөзидә илһам қариниң лагерда өлгәнликини инкар қилмиди.

Мәзкур инкаста илһам қари 2016‏-йили юртиға қайтқандин кейин униң гөрүгә елинған ата-анисиниң қоюп берилгәнлики тилға елинған. Мәктупта йәнә илһам қариниң ана тәрәптин абдуғени вәли, һекимҗан вәли қатарлиқ 5 қериндаш икәнлики вә мөтивәр бир тиҗарәтчи аилидин икәнлики тилға елинған. Әсли атушниң азақ йезф бөгән мәһәллисидин болған, нөвәттә германийәдә яшаватқан паалийәтчи зиббулла өткән һәптиләрдә иҗтимаий таратқуларда тутқундики қолум-қошнилири һәққидә бәргән гуваһлиқ баянатида абдуғени вәли қатарлиқ қериндашларниң аилиси бойичә лагерда икәнликини тилға алған.

Аңлиғучимизниң инкасида әслидә илһам қари билән бирликтә мәзкур җәмәттин аз дегәндә 5-6 балиниң мисирға оқушқа чиққанлиқи, булардин пәқәт илһам қариниңла өлүмидин учур барлиқи қәйт қилинған. Биз азақ йезилиқ сақчиханиға қайта телефон қилғинимизда илһам қари олтурушлуқ мәһәллиниң сақчиханидин нисбәтән узақ икәнликини баян қилди. Уму илһам қариниң лагерда өлгәнлик учурини инкар қилмиди.

Һөрмәтлик радийо аңлиғучилар, бу, мисирдин юртиға қайтқан оқуғучилардин 3‏-кишиниң лагерда җан үзгәнликиниң дәлиллинишидур. Илгирики ениқлашлиримизда мисирдин қайтқан корлалиқ оқуғучилардин абдусалам билән ясинҗанниң лагерда җан үзгәнлики йәрлик даириләр тәрипидин дәлилләнгән иди.