Явропа шәрқий түркистан бирлики тәшкилатиға әсқәрҗан рәис болди

Ихтиярий мухбиримиз әкрәм
2016-11-10
Елхәт
Пикир
Share
Принт
(Солдин оңға) д у қ баш катипи долқун әйса, явропа шәрқий түркистан бирлики рәиси әсқәрҗан вә д у қ муавин рәиси пәрһат юруңқаш әпәндиләр йиғинда. 2016-Йили 6-ноябир, германийә.
(Солдин оңға) д у қ баш катипи долқун әйса, явропа шәрқий түркистан бирлики рәиси әсқәрҗан вә д у қ муавин рәиси пәрһат юруңқаш әпәндиләр йиғинда. 2016-Йили 6-ноябир, германийә.
RFA/Ekrem

Явропа шәрқий түркистан бирлики тәшкилати рәһбәрлик қатлимида өзгәртиш елип берип, уйғур сиясий затлиридин әсқәрҗан әпәндини тәшкилат рәисликигә тәйинлигән.

Явропа шәрқий түркистан бирлики тәшкилати тәшвиқат бөлүминиң иҗтимаий таратқулардики учурлириға асасланғанда, германийәдики уйғур җамаитигә вәкиллик қиливатқан явропа шәрқий түркистан бирлики тәшкилати 2016-йили 11-айниң 6-күни идарә һәйити йиғини өткүзүп, германийәдики сиясий паалийәтчи әсқәрҗан әпәндини идарә һәйити әзалириниң бирдәк мақуллуқи билән мәзкур тәшкилатниң рәисликигә тәйинлигән.

Мәлум болушичә, явропа шәрқий түркистан бирлики тәшкилати ғәрб дунясида, җүмлидин явропада қурулған тунҗи уйғур тәшкилати болуп, 1991-йили германийәниң мюнхен шәһиридә қурулуп паалийәт башлиған. Һазирға қәдәр бу тәшкилат уйғур давасини дуняға, җүмлидин явропа әллиригә тонутуш җәһәттә зор нәтиҗиләрни қолға кәлтүрүпла қалмастин, йәнә сабиқ «дуня уйғур яшлири қурултийи», «шәрқий түркистан (уйғуристан) миллий қурултийи» вә һазирқи «дуня уйғур қурултийи» қатарлиқ тәшкилатларниң қурулушидиму түрткилик рол ойниған вә бу қурултайларға саһибханилиқ қилған.

Явропа шәрқий түркистан бирлики тәшкилати тәшвиқат бөлүминиң учурлирида: «әсқәрҗан әпәнди уйғур миллий һәрикитимиз үчүн көп пидакарлиқ көрсәткән мунәввәр сиясий паалийәтчилиримизниң бири болуп, һазирғичә илгири-кейин, явропа шәрқий түркистан бирлики тәшкилатиниң рәиси, 1998-йили истанбулда қурулған шәрқий түркистан миллий мәркизиниң муавин рәиси, 1999-йили германийәдә қурулған шәрқий түркистан(уйғуристан) миллий қурултийиниң баш катипи, 2004-йили қурулған һазирқи дуня уйғур қурултийиниң муавин рәиси … қатарлиқ муһим вәзипиләрдә болған, шундақла юқириқи пүтүн тәшкилатларниң әң асаслиқ қурғучилириниң бири иди, әсқәрҗан әпәнди йәнә 1992-йили түркийәниң истанбул шәһиридә чақирилған тунҗи нөвәтлик шәрқий түркистан миллий қурултийиға мәхсус вәкил болуп қатнашқан иди» дегән ибариләргә орун берилгән.

Биз дуняниң һәр йәрлиридики уйғур җамаити һәм сиясий тәшкилатлар тәрипидин бирқанчә күндин буян иҗтимаий таратқуларда вә елхәтләрдә тәбриклиниватқан әсқәрҗан әпәндиниң өзини зиярәт қилип, униң рәисликкә тәйинләнгәндин кейинки тәсиратлирини игилидуқ.

Явропа шәрқий түркистан бирлики тәшкилатиниң әсли рәиси «илһам тохти гурупписи» ниң мәсули әнивәрҗан әпәнди болуп, у өзиниң мәзкур тәшкилаттин истепа бериштики сәвәбини изаһлап өтти. Д у қ муавин рәиси, явропа шәрқий түркистан бирлики тәшкилати тәшвиқат бөлүминиң мәсули пәрһат юруңқаш әпәндиму бу қетимқи тәшкилий өзгириш һәққидә өз қарашлирини баян қилди.

Мәзкур тәшкилатниң идарә һәйәт тармиқида һазир 9 нәпәр әза болуп, паалийәтлирини д у қ билән һәмкарлишип елип бармақта.

Пикирләр (0)
Share
Толуқ бәт