Тәйвәндики «тәйвән иттипақ бирлики» партийәсиниң йиллиқ пилан йиғиниға уйғурларму қатнашти

Ихтиярий мухбиримиз һаҗи қутлуқ қадири
2017-01-09
Елхәт
Пикир
Share
Принт
«Тәйвән иттипақ бирлики» партийәсиниң йиллиқ пилан йиғинида японийә уйғур җәмийитиниң рәиси илһам маһмут сөз қилмақта. 2017-Йили 6-январ, тәйбей.
«Тәйвән иттипақ бирлики» партийәсиниң йиллиқ пилан йиғинида японийә уйғур җәмийитиниң рәиси илһам маһмут сөз қилмақта. 2017-Йили 6-январ, тәйбей.
RFA/Qutluq

6-январ тәйвәнниң мәркизи тәйбийда өткүзүлгән «тәйвән иттипақ бирлики»партийәсиниң йиллиқ пилан йиғиниға вә кәчлик ианә топлаш зияпитигә уйғурларму қатнашқан.

Тәйвәндә тәсири бир қәдәр зор болған сиясий тәшкилатлардин бири болған «тәйвән иттипақ бирлики» партийәсиниң йиллиқ хуласә йиғиниға вә кәчлик ианә топлаш зияпитигә японийә уйғур җәмийитиниң рәиси илһам маһмут алаһидә тәклип билән қатнашқан болуп, паалийәткә йәнә тәйвән парламентиниң баш катипи лиң җеҗа,тәйвәндә тонулған мәшһур сиясәтчиләрдин хуаң куңхүй әпәндиләр иштирак қилған.

Паалийәт әтигән саәт ондин кәч саәт сәккизгә қәдәр давам қилған болуп, йиғинға көп санидики һәр саһә кишилири қатнашқан.

Зияритимизни қобул қилған «тәйвән иттипақ бирлики» партийәси яшлар комитетиниң мәсули ху әпәнди мәзкур паалийәткә уйғурларниң алаһидә тәклип қилиниши һәққидә тохтилип: «партийәмиз шәрқий түркистан мустәқиллиқ һәрикитини қоллаш вә шундақла шәрқий түркистан мәсилисини тәйвәндә тәшвиқ қилиш йүзисидин паалийитимизгә японийә уйғур җәмийитиниң рәиси илһам маһмутни алаһидә тәклип қилдуқ» деди.

Тәйвәнниң мәркизи тәйбейдики мәдәнийәт мәркизидә елип берилған «тәйвән иттипақ бирлики» партийәсиниң бу паалийитигә иштирак қилған японийә уйғур җәмийитиниң рәиси илһам маһмут зияритимизни қобул қилип паалийәт һәққидә тохталди.

Зияритимизни қобул қилған «тәйвән иттипақ бирлики» партийәсиниң муавин баш катипи ваң бу қетимқи йиғинда мәзкур партийәниң кәлгүси тәйвәндә елип баридиған паалийәтлиридә дуня уйғур қурултийи, тибәт вә җәнубий моңғулийә қурултийи рәһбәрлирини тәйвәнгә тәклип қилишни мәқсәт қилған һалда бир қисим паалийәтләрни елип баридиғанлиқи тоғрисида тохтилип: «партийимиз кәлгүси пиланлирида шәрқий түркистан кишилик һоқуқ паалийәтчилири билән бирликтә тәйвәндә шәрқий түркистан мәсилисини аңлитиштәк бир түркүм паалийәтләрни елип бериш пилани бар шундақла тибәт, моңғул кишилик һоқуқ паалийәтчилириму буниң ичидә» деди.

Мәзкур паалийәттә сөзгә тәклип қилинған японийә уйғур җәмийитиниң рәиси илһам маһмут өзиниң йиғинда оттуриға қойған бәзи бир тәклиплири үстидә тохталди.

Илһам маһмутниң билдүрүшичә, паалийәттә «тәйвән иттипақ бирлики» партийәсиниң рәиси лю йиде әпәнди сөз қилип, мәзкур партийәниң вә шундақла шәхсән өзиниң буниңдин кейин уйғур мәсилисигә йеқиндин көңүл бөлидиғанлиқини баян қилған.

Илһам маһмутниң ейтишичә, «тәйвән иттипақ бирлики» партийәси 2017-йиллиқ хизмәт пиланида, уйғур кишилик һоқуқ мәсилисигә алаһидә орун бериш, тәйвәндә уйғур мәсилисини кәң көләмдә тәшвиқ қилиш паалийәтлирини елип беришни пиланлиған.

Мәлум болушичә, «тәйвән иттипақ бирлики» партийәси 2001-йили сабиқ тәйвән президенти ли диңхүй тәрипидин қурулған сиясий партийә болуп, мәкзур партийәниң бүйүк нишани тәйвәнни мустәқил дөләт қилип қуруп чиқиш вә бирләшкән дөләтләр тәшкилатиниң етирап қилишини қолға кәлтүрүшни мәқсәт қилған.

Японийәдики бәзи бир уйғур мәсилилири көзәткүчилириниң қаришичә, тәйвәндә уйғур мәсилисини тәйвән мустәқилчилири билән бирликтә тәшвиқ қилиш уйғур мәсилисини тәйвәндә тонутушта вә тәйвәнликләрниң қоллишини қолға кәлтүрүштә бәлгилик иҗабий рол ойнайдикән.

Юқириқи аваз улинишидин тәпсилатини аңлаң.

Пикирләр (0)
Share
Толуқ бәт