18 яшлиқ әли мамут “террорлуқ тәшкилатиға рәһбәрлик қилип” муддәтсиз кесилгән

Мухбиримиз шөһрәт һошур
2015-11-09
Share
Eli-Mamut-muddetsiz-qamaq-turme-sot-305.jpg Террорлуққа күч топлиған вә рәһбәрлик қилған, дәп муддәтсиз қамақ җазасиға һөкүм қилинған мәһбус ели мамутниң кесилиштин 2 йил бурунқи, йәни толуқсиз оттурини пүттүргән чағдики рәсими.
Photo: RFA

Айкөл пәйшәнбә базарлиқ сиясий тутқунлар (3)

Инкаслардин мәлум болушичә, уйғур районида бултур 6-айда башланған террорчиларға бир йил қаттиқ зәрбә бериш борини ақсу айкөлгә қәдәм басқинида рәсмий бир сиясий қуюнға айланған.

Бу қуюн пәйшәнбә базардики 10 нәччә өсмүрниму оқуватқан мәктәплиридин учуруп елип җаза лагерлириға ташлиғаникән; мана булардин бири, нөвәттә үрүмчидики 5-түрмидә җаза муддитини өтәватқан 18 яшлиқ әли мамуттур. Мәзкур сиясий қуюнда өсмүр әли мамутқа террорлуқ гурупписиға рәһбәрлик қилиштин ибарәт йешиға нисбәтән толиму чоң бир қалпақ кийдүрүлгән; әмма әли мамутниң аилисигә у қурған тәшкилатниң бирәр һәрикити яки программиси вә һәтта нами һәққидиму мәлумат берилмигән. Мәзкур аилә пәқәт әли мамутниң 5-түрмигә йөткәлгәнлики һәққидила түрмидин хәт тапшурувалған. Түрмә хетидә әли мамутниң террорлуққа күч топлаш вә рәһбәрлик қилиш билән әйиблинип муддәтсиз кесилгәнликила әскәртилгән.

Мәлум болушичә, 2013-йили толуқсиз оттурини пүттүргән әли мамут, 2014-йили ақсу шәһиридә ечилған ишчи-техник мәктипигә әкетилгән, у мәктәпкә берип узун өтмәй йәни 2014-йили 9-айниң ахири тутқун қилинған, аилиси бир һәптә кейин униң тутулғинидин хәвәр тапқан. Әли мамут бу йил 7-айниң 15-күни сотлинип муддәтсиз кесилгән, сотқа аилиси қатнаштурулмиған.

Мәһбус әли мамут оқуған ақсу шәһәрлик ишчи-техник мәктипидики әһвалдин хәвәрдар кишиләрдин бириниң радиомизға ашкарилишичә, мәзкур мәктәптин әли мамут билән бирликтә 13 оқуғучи җазаланған; буларниң мәзкур җазаға сәвәб болған қилмиши қол телефони арқилиқ торға чиқип даириләр тәрипидин қанунсиз дәп қаралған материялларни көрүш, бир-биригә көрүш үчүн тәвсийә қилиш вә бир қетимлиқта топлишип олтуруп көрүш болған. Әли мамут әнә шу қетимлиқ топлиништа сәвәбчи рол ойниғанлиқи үчүн террорлуққа күч топлаш вә рәһбәрлик қилиш билән әйибләнгән һәмдә муддәтсиз кесилгән.

Мәһбус әли мамутниң дадисиниң баянлиридин қариғандиму, әли мамутниң тутулушиға қол телефони сәвәб болған, униң мәктәптә телефон ойниған балиларға башламчилиқ қилиши террорлуққа рәһбәрлик қилиш дәп қаралған. Биз ақсу шәһәрлик әдлийә органлириға телефон қилғинимизда, улар бу өсмүр мәһкумлар тоғрисида еғиз ечишқа унимиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт