18 Yashliq eli mamut “Térrorluq teshkilatigha rehberlik qilip” muddetsiz késilgen

Muxbirimiz shöhret hoshur
2015-11-09
Share
Eli-Mamut-muddetsiz-qamaq-turme-sot-305.jpg Térrorluqqa küch toplighan we rehberlik qilghan, dep muddetsiz qamaq jazasigha höküm qilin'ghan mehbus éli mamutning késilishtin 2 yil burunqi, yeni toluqsiz otturini püttürgen chaghdiki resimi.
Photo: RFA

Ayköl peyshenbe bazarliq siyasiy tutqunlar (3)

Inkaslardin melum bolushiche, Uyghur rayonida bultur 6-ayda bashlan'ghan térrorchilargha bir yil qattiq zerbe bérish borini aqsu aykölge qedem basqinida resmiy bir siyasiy quyun'gha aylan'ghan.

Bu quyun peyshenbe bazardiki 10 nechche ösmürnimu oquwatqan mektepliridin uchurup élip jaza lagérlirigha tashlighaniken؛ mana bulardin biri, nöwette ürümchidiki 5-türmide jaza mudditini ötewatqan 18 yashliq eli mamuttur. Mezkur siyasiy quyunda ösmür eli mamutqa térrorluq guruppisigha rehberlik qilishtin ibaret yéshigha nisbeten tolimu chong bir qalpaq kiydürülgen؛ emma eli mamutning a'ilisige u qurghan teshkilatning birer herikiti yaki programmisi we hetta nami heqqidimu melumat bérilmigen. Mezkur a'ile peqet eli mamutning 5-türmige yötkelgenliki heqqidila türmidin xet tapshuruwalghan. Türme xétide eli mamutning térrorluqqa küch toplash we rehberlik qilish bilen eyiblinip muddetsiz késilgenlikila eskertilgen.

Melum bolushiche, 2013-yili toluqsiz otturini püttürgen eli mamut, 2014-yili aqsu shehiride échilghan ishchi-téxnik mektipige ekétilgen, u mektepke bérip uzun ötmey yeni 2014-yili 9-ayning axiri tutqun qilin'ghan, a'ilisi bir hepte kéyin uning tutulghinidin xewer tapqan. Eli mamut bu yil 7-ayning 15-küni sotlinip muddetsiz késilgen, sotqa a'ilisi qatnashturulmighan.

Mehbus eli mamut oqughan aqsu sheherlik ishchi-téxnik mektipidiki ehwaldin xewerdar kishilerdin birining radi'omizgha ashkarilishiche, mezkur mekteptin eli mamut bilen birlikte 13 oqughuchi jazalan'ghan؛ bularning mezkur jazagha seweb bolghan qilmishi qol téléfoni arqiliq torgha chiqip da'iriler teripidin qanunsiz dep qaralghan matériyallarni körüsh, bir-birige körüsh üchün tewsiye qilish we bir qétimliqta topliship olturup körüsh bolghan. Eli mamut ene shu qétimliq toplinishta sewebchi rol oynighanliqi üchün térrorluqqa küch toplash we rehberlik qilish bilen eyiblen'gen hemde muddetsiz késilgen.

Mehbus eli mamutning dadisining bayanliridin qarighandimu, eli mamutning tutulushigha qol téléfoni seweb bolghan, uning mektepte téléfon oynighan balilargha bashlamchiliq qilishi térrorluqqa rehberlik qilish dep qaralghan. Biz aqsu sheherlik edliye organlirigha téléfon qilghinimizda, ular bu ösmür mehkumlar toghrisida éghiz échishqa unimidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet