Хотән маңлайда йол тәкшүрүш понкитиға от қоюветиш вәқәсиниң сәвәблири һәққидә инкаслар

Хотәнниң қарақаш наһийә маңлай йезисида җүмә күни сәһәрдә бир йол тәкшүрүш понкитиға от қоюветиш вәқәси йүз бәргән; вәқәдә 3 нәпәр хадим отта көйүп өлгән вә вә икки нәпири пичақ тиқип өлтүрүлгән иди.

Мухбиримизниң бу вәқә һәққидики илгириләп ениқлашлири давамида, вәқәниң сәвәби һәққидиму охшимиған инкаслар оттуриға чиқти. Бәзи аһалиләр вәқәниң асаслиқ сәвәби һәққидә йол тәкшүрүш понкитидики хадимларниң пәрәнҗилик аялларға қилған зораванлиқлирини көрсәтсә; йәнә бәзиләр хадимларниң йолдин өткән қатнаш қораллириға һәддидин зиядә рәсмийәт тәләплирини қоюп кишиләрни изчил һалда бозәк қилғанлиқини көрсәтти. Йәнә бәзиләр вәқәниң нөвәттә уйғур районида давам қиливатқан “бир йил қаттиқ зәрбә бериш” долқуниға қарита интиқам елиш һәрикити икәнликини оттуриға қойди.

Мухбиримизниң бүгүнки ениқлашлири давамида йәнә, вәқә садир қилғучиларниң техичә тутулмиғанлиқи айдиңлашти.

Бәзи көзәткүчиләр мулаһизилиридә вәқә көрүнүштә нөвәттики вәзийәт билән мунасивәтликтәк қилсиму, маһийәттә буниң, районда йиллардин бери давам қилип келиватқан хитай һакимийитигә қарши күрәшниң бир қисми икәнликини, нөвәттики вәзийәтниң пәқәт күрәшниң техиму кәң вә шиддәтлик давам қилишиға түрткә болуватқанлиқини илгири сүрүшмәктә.

Тәпсилатини юқиридики аваз улинишидин аңлиғайсиләр.