Xotende jüme küni yüz bergen weqede az dégende bir kishi ölgenliki ashkarilanmaqta

Muxbirimiz shöhret hoshur
2014-10-02
Share
xoten-maniwer-xitay-saqchi.jpg Xitay qoralliq küchliri térrorluqqa qarshi turush manéwiri ötküzdi. 2014-Yili 6-iyun, xoten.
AFP

Ijtima'iy taratqular ötken jüme küni yeni 26-séntebir küni xoten shehiride partlash weqesi yüz bergenliki, weqedin kéyin xitayning xoten shehirige yene köplep esker yötkigenliki heqqide xewer bergen idi. Muxbirimiz bu heqte shenbe küni ehwal igiligen chéghida sheherdiki bir saqchixana xadimi, shu küni melum bir weqe bilen bir kishining doxturxanida jan üzgenlikini ashkarilighan bolsimu, emma néme weqelikidin xewersizlikini éytqan idi.

Muxbirimizning bügünki igileshliri dawamida, ötken jüme küni xoten sheher yaqisidiki tosilla dégen yézida weqe yüz bergenliki, weqening jüme namizidin qaytqan 10 motsiklitliq kishining xoten shehirige qarap yürüsh qilishi seweblik kélip chiqqanliqi ashkarilandi.

Ötken jüme küni xoten shehiride partlash yüz bergenliki heqqide ijtima'iy taratqularda xewer tarqalghandin kéyin, biz xoten sheher ichidiki bir saqchixanigha téléfon qilduq. Saqchi xadimi bir kün awwal yüz bergen weqedin xewersizlikini, emma, nurbagh saqchixanisi etrapidiki bir doxturxanigha bir yaridarning apirilghanliqi we béshidin zeximlen'gen bu yaridarning doxturxanida jan üzgenlikini pash qildi. Bügün biz yawagh saqchixanisigha téléfon qilghinimizda, saqchi xadimi bügün özi qatnashqan yighinda anglighan bir qisim weqeler heqqide melumat berdi. Uning yighinda anglighanlirigha asasen bayan qilishiche, ötken jüme küni xoten sheher yaqisidiki tosilla meschitidin qaytqan 10 motsiklitliq kishi, xoten sheher ichige qarap yürüsh qilghan, ularning hujum pilani barliqini bayqighan saqchilar aldini tosup bir terep qilghan. Emma yighinda ularning bir terep qilinish jeryani heqqide tepsiliy melumat bérilmigen. Bu saqchi xadimi yene xotende eng yéqinda yüz bergen weqeler qatarida xoten sheher ichide bir xitay köchmenning bir Uyghur teripidin pichaqliq hujumgha uchrighanliqinimu bayan qildi.

Yuqiriqi melumatlardin tusulla yézisidin xoten shehirige qarap yolgha chiqqan 10 motsiklitliqning bir terep qilinish weqesi bilen xoten nurbagh tewelikide bir yaridarning doxturxanida ölgenlik weqesining oxshash bir weqe yaki emesliki éniq emes. Eger bir weqe bolghan teqdirde, jüme küni xotende yüz bergen weqede az dégende bir kishi ölgenliki ashkarilanmaqta.

Tepsilatini awaz ulinishidin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet