Uyghurlar bélgiye paytexti biryussélda 4 chong pa'aliyet ötküzüshke hazirlanmaqta

Ixtiyariy muxbirimiz ekrem
2018-02-19
Élxet
Pikir
Share
Print
Brussélda ötküzülidighan 5 ming kishilik namayishning logosi.
Brussélda ötküzülidighan 5 ming kishilik namayishning logosi.
RFA/Ekrem

Bu yil aprélda muhajirettiki Uyghurlarning bélgiye paytexti biryussélda 4 chong pa'aliyet élip baridighanliqi melum bolmaqta.

17-Féwral ötküzülgen dunya Uyghur qurultiyi ijra'iye komitétining téléfon yighinidin melum bolushiche, muhajirettiki Uyghurlar bu yil 4-ayda bélgiye paytexti biryussélda 4 chong pa'aliyet élip baridiken.

17-Féwraldiki téléfon yighini neq meydanidin alghan melumatlirimizgha asaslan'ghanda, 22-23-aprél künliri tunji nöwetlik d u q ijra'iye komitétining kéngeytilgen yighini bélgiye paytexti biryussélda ötküzülidiken.

D u q re'isi dolqun eysa ependining bildürüshiche, ötken yili myunxénda chaqirilghan d u q ning 6-nöwetlik pewqul'adde wekiller qurultiyida her 6 ayda bir qétim ijra'iye komitétining yighinini ötküzüsh qarar qilin'ghan bolup, bu qararning rohigha bina'en tunji nöwetlik ijra'iye komitéti yighini bu yil biryussélda ötküzülidiken.

4-Ayning 24-25-künliri yene "3-Nöwetlik sherqiy türkistan istratégiye muhakime yighini" mu biryussélda chaqirilidiken. Türkiye hajétepe uniwérsitétining dotsénti, istratégiye mutexessisi doktor erkin ekrem ependining bayan qilishiche, bu qétimqi yighinda dunya weziyiti we Uyghur élige munasiwetlik muhim mesililer muzakire qilinidiken.

Melum bolghinidek, tunji nöwetlik "Sherqiy türkistan istratégiye muhakime yighini" 2017-yili 25-27-féwral künliri shimaliy qibris türk jumhuriyitide, ikkinchi nöwetliki bolsa ötken yilining 19-21-may künliri gérmaniye paytexti bérlin shehiride ötküzülgen idi.

D u q ning téléfon yighinidin ashkara bolushiche, 4-ayning 26-küni yawropa parlaméntida "Sherqiy türkistanning nöwettiki weziyiti" namliq ilmiy muhakime yighini bolup ötidiken. Bu yighin'gha ötken yili 19-öktebir yawropa parlaméntida qurulghan "Uyghur dostluq guruppisi" ning xadimliri we bashqa yene bir qisim parlamént ezaliri qatnishidiken. Bu yighin'gha yene tunji nöwetlik d u q ijra'iye komitétining kéngeytilgen yighinigha we "3-Nöwetlik sherqiy türkistan istratégiye muhakime yighini" gha qatnishish üchün kelgen köpligen Uyghurlarmu ishtirak qilidiken.

D u q bu yil 23-yanwar küni chaqiriq élan qilip, 4-ayning 27-küni bélgiye paytexti biryusséldiki yawropa parlaménti aldida 5 ming kishilik namayish ötküzidighanliqini bildürgen idi. Bu chaqiriqning rohigha bina'en, muhajirettiki köpligen Uyghurlar, bolupmu yawropadiki Uyghurlar 27-aprél ötküzülidighan bu namayishqa jiddiy hazirliq qilmaqta iken. D u q bu namayish munasiwiti bilen, yawropada pa'aliyet élip bériwatqan 10 Uyghur teshkilati bilen "5 Ming kishilik namayish teyyarliq komitéti" ni qurup chiqqan.

Yuqiriqi 4 chong pa'aliyetni yawropa ittipaqining merkizi bolghan bélgiye paytexti biryussélgha orunlashturushning ehmiyiti heqqide d u q ning mu'awin re'isi perhat muhemmidi ependi öz qarashlirini ipade qilip ötti.

Toluq bet