Yaponiye Uyghur jem'iyiti qurulghanliqining besh yilliqi xatirilendi

6 - Ayning 21 - küni tokyoda Uyghurlar, yaponlar we bir qisim chet'ellikler birlikte katta murasim ötküzüp, yaponiye Uyghur jem'iyiti qurulghanliqining besh yilliqi xatirilidi.

Xatirilesh murasimi sherqiy türkistan we yaponiye dölet marshi bilen bashlandi. Sehnige sherqiy türkistanning ay yultuzluq bayriqi bilen 5 - iyul weqeside ghayib bolghan ghayiblarning süretliri ésilghan bolup, sherqiy türkistan dölet marshi bashlinish bilen pa'aliyetke qatnashquchilar sehnige ésilghan ghayiblarning süretlirini körüp, köngülliri buzulup, köz yéshi qilishti.

Xatirilesh pa'aliyitige Uyghur milliy herikiti rehbiri rabiye qadir xanim bashchiliqidiki dunya Uyghur qurultiyi rehberliri, teywen - Uyghur dostluq jem'iyitining re'isi linba'oxu'a ependim, jenubiy mongghuliye xelq partiyisining bash katipi da'ichin, yaponiyidiki bir qisim Uyghur mesilisini qollighuchi teshkilatlarning wekilliri qatnashti.

Xatirilesh pa'aliyitide Uyghur milliy herikitining rehbiri rabiye qadir xanim söz qilip, mezkur jem'iyetni qollawatqan yaponlargha rehmet éytish bilen birge yaponiyide oquwatqan Uyghur oqughuchilargha her - jehette yéqindin yardemde boluwatqan yaponlargha Uyghur xelqi namidin rehmet éytti. Ziyaritimizni qobul qilghan rabiye qadir xanim bu heqte toxtilip ötti.

Mezkur jem'iyetni qurghuchilardin biri bolghan dunya Uyghur qurultiyining mu'awin re'isi séyit tümtürk bu jem'iyetning ötmüshi we kelgüsi heqqide söz qildi.

Séyit tümtürk yaponiye Uyghur jem'iyitige bolghan tesiratingiz qandaq dégen so'alimizgha jawab berdi.

Xatirilesh pa'aliyitide dunya Uyghur qurultiyi mu'awin re'isi ilham mexmut söz qilip, yaponiye Uyghur jem'iyitining besh yildin buyan tereqqiy qilip bügünki mushu haletke kélishini yapon xelqining yardimidin we qollishidin ayrim qarighili bolmaydighanliqini, yapon xelqining buningdin kéyinmu téximu köp qollishini ümid qilidighanliqini bildürdi.

Pa'aliyet dawamida yaponiye Uyghur jem'iyitining aktip ezaliridin biri bolghan gülistan xanim özining tesiratini bayan qildi.

Yaponiye Uyghur jem'iyiti qurulghanliqining besh yilliqini xatirilesh pa'aliyitige jem'iy mingdin oshuq kishi qatnashqan bolup, qatnashquchilar xatirilesh pa'aliyitige alahide teyyarlan'ghan Uyghurche we yaponche yémekliklerge éghiz tegdi.

Xatirilesh pa'aliyiti kech sa'et alte yérimdin on'gha qeder dawamlashti.