Yüzligen namayishchi xitayning enqere elchixanisi aldida iptar qilip xitayni eyiblidi

Muxbirimiz erkin tarim
2014.07.18
turkiye-enqere-xitay-elchiliki-aldida-iptar.jpg Namayishchilar xitay elchixanisi aldida éghiz achti
RFA/Erkin Tarim

Ramizan éyida xitay hökümitining Uyghurlargha élip bériwatqan diniy bésim siyasitini yani Uyghurlarni rozi tutquzmasliq siyasitige naraziliq bildürüsh üchün 7 - ayning 17 - küni yüzligen türk namayishchi xitay elchixanisi aldida éghiz achti. Iptar waqtidin burun muxbirlargha bayanat bergen kadirlar uyushmisining mu'awin bashliqi haji bayram tonbul ependi xitay zulumini eyiblidi.

U, xitay hökümitining Uyghurlarni assimilyatsiye we yoq qilish siyasiti yürgüzüwatqanliqini éytti.

Xitay elchixanisi aldigha yighilghan yüzligen kadirlar uyushmisi ezaliri qollirida sherqiy türkistan bayriqi, türk bayriqi we lozunkilarni kötürgen halda “Sherqiy türkistandiki xitay zulumini lenetleymiz!”, “Türkiye uxlima؛ qérindashliringgha ige chiq!”, “Sherqiy türkistan'gha erkinlik bérilsun!”, “Musulman sherqiy türkistan xelqi bigunahtur!” we “Uyghurlarning rozi tutushigha uzatqan qollar sundurulsun!” dégendek sho'arlarni towlashti.

Namayishchilar yene iptar waqti bolushtin burun xitay elchixanisi aldida qur'an tilawiti qildi.

Arqidin bu pa'aliyetni uyushturghan türkiye kadirlar uyushmisi mu'awin bashliqi haji bayram tonbul ependi muxbirlargha bayanat berdi.

U, aldi bilen Uyghur musapirlar toghrisida melumat bérip mundaq dédi: xitay döliti sherqiy türkistanni bésiwalghan kündin bügün'giche sherqiy türkistanliqlargha her türlük bésim we zulum siyasitini élip barmaqta. Bashqa döletlerge bolupmu malayshiya, tayland we türkiye qatarliq döletlerge qéchip kelgen Uyghurlar birleshken döletler teshkilatining musapirlar salahiyitigimu érishelmeywatidu. Hetta bezi döletler dölitige qéchip kelgen Uyghurlarni xitaygha qayturup bermekte, xitay ulargha ölüm jazasi bermekte. Uyghurlar tarixta körülüp baqmighan derijide qéyin künlerni béshidin ötküzmekte.

Haji bayram tonbul ependi hazir mubarek rozi éyida xitayning Uyghurlarning rozi tutushini chekligenlikini, xitayning bu insanliq qélipidin chiqqan siyasitini eyibleydighanliqini bayan qilip mundaq dédi: hazir ramizan éyida sherqiy türkistanda Uyghur kadirlar bilen oqughuchilarning rozi tutushi chekliniptu. Rozi tutush islam dinining bir buyruqi.

Musulmanlar üchün 5 perizining biridur. Insan heq we hoquqlirigha peqet hörmet qilmaydighan xitay dölitining insanlarning étiqad erkinlikini cheklesh siyasitini eyiblesh üchün bügün xitayning enqere elchixanisi aldida namayish qilip olturuptimiz. Xudayim buyrusa bizning bu awazimizni birleshken döletler teshkilati anglar, Uyghurlarning derd - peryadigha qulaq salar. Xitay hökümitining bu bésim siyasitini toxtitish üchün xizmet qilar, dep oylaymiz.

Türkiye kadirlar uyushmisi mu'awin re'isi haji bayram tonbul ependi sherqiy türkistan xelqining erkinliki üchün qolliridin kelgenni qilidighanliqini bayan qilip mundaq dédi: biz kadirlar uyushmisi bolush süpitimiz bilen sherqiy türkistan mesilisini her da'im küntertipke ekélishke tirishiwatimiz. Biz kadirlar uyushmisi bolush süpitimiz bilen ötken hepte sa'adet partiyesi istanbulda ötküzgen “Sherqiy türkistan we pelestindiki zulumgha qarap turma” mawzuluq chong uchrishishqa qatnashtuq. Teshkilatimizning türkiyening 81 wilayitidiki shöbiliri sherqiy türkistan mesilisini her xil pa'aliyetler arqiliq kün tertipke élip kélishke tirishmaqta.

Bügünki pa'aliyet türkiye dölet téléwiziyesi qanili we shexsi téléwiziye qanallirida tarqitildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.