Chet'eldiki Uyghurlar: ramizan biz üchün birlik, inaqliq rishtini mehkem baghlaydighan hidayet soruni bolmaqta

Ixtiyariy muxbirimiz ekrem
2013.07.15
germaniye-uyghur-ramizan-iftar-305.png Gérmaniyining myunxén shehiride yashawatqan Uyghur jama'iti iptar üstide
RFA/Ekrem

Uyghur ilida diniy réjim künsiri éghirlishiwatqan, Uyghur xelqi étiqad erkinlikining sanaqsiz teqipliri astida azap tartiwatqan bir chaghda, chet'ellerdiki Uyghurlar özlirige nisip bolghan hör hayatni qedirlep, ramizanni milliy we diniy örp - adetlirige uyghun rewishte köngüllük ötküzüshke tirishmaqta.

Jümlidin, gérmaniyining myunxén shehiride yashawatqan Uyghur jama'itimu her yilqigha oxshash, bu yilliq ramazan éyini nahayiti janliq we mol mezmunluq bashlidi.

Mubarek ramizan éyi kirgen kündin bashlap, gérmaniyining myunxén shehiridiki Uyghur jama'iti her küni nöwet bilen iptar bérish pa'aliyitini qanat yaydurup, diniy mejburiyetlirini ada qilishning hozurini sürüsh bilen birge, iptar sorunlirini birlik, inaqliq üchün xizmet qildurmaqta. Her künlük iptar sorunini 50 - 60 tin artuq Uyghur bir yerge jem bolup ötküzüp, zulum astidiki xelqining nijatliqi üchün du'a qilmaqta we ewladlirigha hidayet tilimekte.

Yawrupa sherqiy türkistan birliki teshkilatining re'isi, d u q ning yawrupa parlaméntidiki wekili eniwerjan ependi ziyaritimizni qobul qilip, myunxénda dawam qiliwatqan iptar sorunliridin köp hayajanliniwatqanliqini, xiyal qushlirining ana wetende ötken baliliq chaghlirigha qarap perwaz qiliwatqanliqini tilgha élip ötti. U sözide, ramizan éyining bu yerdiki Uyghurlar üchün birlik, inaqliqni téximu mustehkemleydighan hidayet sorunigha ayliniwatqanliqini, xitay hökümitining Uyghurlarni bölüsh, parchilash, yoqitish süyqestining emelge ashmighanliqini eskertti.

D u q medeniyet - ma'arip komitétining mes'uli, Uyghur ziyaliysi ablimit tursun ependi bu yerdiki ramizanliq pa'aliyetlerning yalghuz diniy mejburiyetlerni ada qilish soruni bolupla qalmastin, öz nöwitide yene Uyghur wetinining nöwettiki weziyiti we milletning teqdiri üstide muhakime, mulahize qilish sorunimu boluwatqanliqini tilgha aldi. U sözide yene, wetendiki xelqning ramizanliq hali bilen chet'ellerdiki Uyghurlarning ehwalini sélishturup ötti.

Chet'el metbu'atliridiki xewerlerde, xitay hökümitining Uyghur ilida yürgüziwatqan diniy bésim siyasiti ramizanning kirishi bilen yenimu kücheygen bolup, bu xil zorluq bilen idare qilish, qattiq qolluq bilen basturushqa tayan'ghan hökümranliqning Uyghurlar rayonida tinch, muqim bir weziyetning wujudqa chiqishigha imkan bermeydighanliqi bayan qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.