"Gu'entanamodiki Uyghurlar: bimenilik tutqunliri" namliq filim teywendiki filim féstiwalida körsitildi

Muxbirimiz irade
2017-09-22
Share
bimenilik-tutuqunliri-filmi-teywende.JPG Teybéy shehiride ötküzülgen "Yaylaq medeniyiti féstiwali" din bir körünüsh. 2017-Yili 22-séntebir, teybéy, teywen.
RFA/Irade

22-Séntebir, yeni jüme küni teywenning teybéy shehiride "Yaylaq medeniyiti féstiwali" bashlan'ghan bolup, féstiwalning bashlinish filimi süpitide "Gu'entanamodiki Uyghurlar: bimenilik tutqunliri" namliq höjjetlik filim körsitilgen. Igilinishiche, bu féstiwalgha qatnashturulghan 10 filimning töti Uyghurlargha munasiwetlik iken.

Kanada wetendashliqidiki patrishyo hénriku'éz ependining rézhisorluq qilishi bilen ishlen'gen 90 minutluq höjjetlik filim "Gu'entanamodiki Uyghurlar: bimenilik tutqunliri" teywendiki filim féstiwalining bashlinish filimi süpitide qoyulup, körürmenlerning zor qiziqishini qozghidi. Bu filimde gu'entanamodin albaniyege yerleshtürülgen ababekri qasim, bérmudagha yerleshtürülgen xélil we palawgha yerleshtürülgen exmet qatarliq üch neper Uyghurning eslime we bayanliri arqiliq gu'entanamodiki Uyghur tutqunlarning hayati teswirlen'gen. 

Filimde yene gu'entanamodiki Uyghur tutqunlarning délosigha biwasite arilashqan kishilermu orun alghan bolup, ulargha uzun yil terjimanliq qilghan roshen abbas xanim ene shularning biri. U féstiwalni uyushturghuchi orun bolghan "Teywen-tibet dostluq jem'iyiti" ning teklipige bina'en teywen'ge bérip, féstiwalning échilish murasimigha qatnashqan we filimdin kéyinki söhbet yighinida so'allargha jawab bergen. Roshen xanim ziyaritimizni qobul qilip, filim qoyulghandin kéyin körürmenler arisida zor tesir peyda qilghanliqini éytti.

Bu filim féstiwaligha teklip bilen qatnashquchilarning biri yaponiye Uyghur jem'iyitining re'isi ilham mexmut ependi bolup, u filim féstiwalining wujudqa chiqish jeryani heqqide toxtaldi. U, "Uyghur, tibet, mongghul qatarliq milletler mesilisini teywen xelqige tonushturush we xitay hakimiyitining epti-beshirisini échip bérish bu qétimqi féstiwalning asasiy meqsiti", dédi. 

Filim féstiwaligha qatnashqan teywenlik edib xong xong échilish murasimida qilghan sözide, gu'entanamodiki Uyghurlargha a'it filimni körgendin kéyinki héssiyatini mundaq bayan qildi: "Biz lyu shyawboning, li mingjéning délolirini körgen. Emma Uyghurlar heqqidiki bu 'bimenilik tutqunliri' filimini körgendin kéyin ular arisida zich baghlinish barliqini hés qilisiz. Bu filim peqet xitay chong quruqluqini chüshinish üchünla emes belki bir az sanliq milletning qandaq qilip zorawanliq yolini tallashqa mejbur bolghanliqini chüshinishtimu muhim qimmetke ige dep oylaymen." 

Roshen abbas xanim mezkur höjjetlik filimning Uyghurlar hazirqidek térrorluq bilen qariliniwatqan bir shara'itta teywende qoyulushining ularning Uyghur mesilisini yenimu chongqurlighan halda chüshinishi üchün ehmiyiti barliqini tekitlidi. 

Melum bolushiche, bu filim féstiwalida yüzlerche filim arisidin tallan'ghan 10 filim qoyulghan bolup, uning töti Uyghurlargha a'it iken. Bu filimlarning hemmisi chet'ellik rézhisorlar teripidin ishlen'gen we Uyghurlarning siyasiy, ijtima'iy mesililiri etrapliq yorutulghan filimlar iken. 

Mezkur filim féstiwaligha qatnashturulghan filimlar teywenning teybéy, teynen, teychong qatarliq 3 shehiride körsitilidighan bolup, féstiwal teywende xéli zor qollashqa érishken. Gu'entanamodiki Uyghurlar heqqide ishlen'gen bu filim hazirgha qeder kanada, en'gliye, gollandiye, türkiye, chéxiye qatarliq döletlerdiki filim féstiwallirida qoyulup yuqiri bahagha érishken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet