Д у қ рәһбәрлири малайшияниң 28 нәпәр уйғурни хитайға қайтуруп бәргәнликигә наразилиқ билдүрди

Ихтиярий мухбиримиз әкрәм
2017-01-13
Share
malayshiya-uyghur-panahliq-tutqun.jpg Малайшияда тутқун қилинған уйғур мусапирлар. 2014-Йили март.
dailysabah.com


Уйғур көзәткүчилири малайшия һөкүмити хитайға қайтуруп бәргән 28 уйғурниң террор билән алақиси барлиқидин гуманланмақта.

Америка авазиниң 13-январдики хәвиридә баян қилинишичә, алдинқи күни бейҗиңда зиярәттә болған малайшия муавин баш министири заһид 2013-йилидин буян малайшияниң оттура шәрққә берип ислам дөлити террорлуқ сепигә қошулмақчи болған 28 нәпәр уйғур террор гумандарини хитайға қайтуруп бәргәнликини ашкарилиған.

Хәвәрдә тилға елинишичә, заһид мухбирларға қилған сөзидә, хитайға қайтурулған бу уйғурларниң малайшиядин түркийәгә берип, ахирида түркийәдин ирақ яки сүрийәгә кирип, ислам дөлити сепигә қошулмақчи болғанлиқини тәкитлигән һәмдә уларни "шәрқий түркистан ислам һәрикити" тәшкилатиниң әзалири, дәп атиған.

Малайшияда нәшрдин чиқидиған "йеңи қанал гезити" бу һәқтики баянлирида заһидниң сөзидин мисаллар елип "түркийә, сүрийә вә ирақта хитай пуқралири бар. Улар башқа дөләтләр арқилиқ малайшияға киргән, андин башқа дөләтләрниң хәлқаралиқ рәсмийәтлиригә тайинип түркийәниң истанбул яки әнқәрә арқилиқ сүрийә яки ираққа кирмәкчи болған" дегән.

Хәвәрдә әскәртилишичә, малайшияниң муавин баш министири заһидниң өз нөвитидә, ичкий ишлар министирилиқ вәзиписиму болуп, у сөзидә йәнә, хитайға қайтурулған бу уйғурлар малайшиядин айрилидиған чағда малайшия сақчилири уларни қолға елиштин илгири хитай тәрәп билән ахбаратта ортақлашқан. Хитай ахбарат органлири малайшия һөкүмитини бу гумандарларға мунасивәтлик фезилогийилик учурлар билән тәминлигән. Хитай тәрәп малайшия һөкүмити қайтуруп бәргән бу уйғурларни тапшуруп алғандин кейин, малайшия сақчи тәрәпкә рәһмәтлирини билдүргән. Бирақ, бу уйғурларниң кимлики, ақивити һәққидә һечқандақ мәлумат йоқ.

Д у қ муавин рәиси өмәр қанат әпәнди бу хусуста америка авази мухбириниң зияритини қобул қилғанда, малайшия һөкүмити хитайға қайтуруп бәргән бу уйғурларниң террор гумандари икәнликигә даир қолида һечқандақ дәлил-испат йоқлуқини, бу уйғурларниң хитай зулмидин қечип, түркийәдә панаһлинишни арзу қилғанлиқини, түркийәдин башқа ислам вә түрк дунясиниң уйғурлар үчүн бихәтәр әмәсликини илгири сүргән.

Д у қ рәһбәрлири малайшия һөкүмитиниң 28 нәпәр уйғурни хитайға қайтуруп бәргәнликидин хәвәр тапқандин кейин, өзлириниң наразилиқлирини баян қилип өтти. Д у қ муавин рәиси үмид агаһи, пәрһат муһәммиди вә қурултай баш катипи долқун әйса әпәндиләр бу һәқтә зияритимизни қобул қилип, қарашлирини оттуриға қойди.

<http://www.voachinese.com/a/china-malaysia-20170112/3674604.html>

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт