Shwétsiye we gollandiyede xitaygha qarshi namayish boldi

Amistérdamdiki xitay elchixanisi aldida ötküzülgen namayish. 2017-Yil 1-öktebir, amistérdam, gollandiye.

Sitokholmdiki xitay elchixanisi aldida ötküzülgen namayish. 2017-Yil 1-öktebir, sitokholm, shiwétsiye.

1-Öktebir küni shiwétsiyening sitokholim we gollandiyening amistérdam sheherliridiki xitay elchixana we konsulxaniliri aldida naraziliq namayishliri élip bérildi.

Shiwétsiyening sitokholim shehiridiki namayish meydanidin ziyaritimizni qobul qilghan abdullah ependi, bu namayishni “Shiwétsiye Uyghur ma'arip uyushmisi” orunlashturghanliqini we mongghullar, tibetlikler bilen birlikte namayish élip barghanliqini eskertip, bu qétimqi namayishning meqsidi heqqide toxtaldi. 

Shiwétsiyediki namayish chüshtin kéyin sa'et 13:00 da bashlan'ghan bolup, ikki sa'et dawamlashqan bu namayishqa qatnashqan yene bir xanimmu, özining bu qétimqi namayish heqqidiki tesiratini bildürüp ötti. 

1-Öktebir küni yene gollandiyening amistérdam shehiridiki Uyghurlarmu “Yawrupa sherqiy türkistan ma'arip jemiyiti” qatarliq teshkilatlarning teshkillishi bilen amistérdamdiki xitay konsulxanisi aldida sa'et 13:00-14:30 giche namayish élip barghan bolup, neq meydandin ziyaritimizni qobul qilghan mezkur teshkilat rehberliridin abdurahman hajimmu xitay üchün dölet bayrimi bolghan bu künning Uyghurlar üchün “Matem küni” hésablinidighanliqini ilgiri sürdi. Mezkur teshkilatning mesulliridin obulqasim ependimu bu qétimqi namayish heqqide qarashlirini bildürdi. 

Gollandiyediki jama'et erbabi, “Yawrupa sherqiy türkistan ma'arip jemiyiti” ning mes'ulliridin eysa qarimu bügünki bu namayish heqqide toxtilip, pütün dunyadiki Uyghurlarning zich ittipaqlishishini teshebbus qildi. 

Namayishchilarning bildürishiche, ular ay-yultuzluq kökbayraq we türlük teshwiqat lozunkilirini kötürüshüp, jarangliq shu'arlar bilen xitay hakimiyitige bolghan ghezeplirini ipade qilish bilen birge, teshwiqat wastiliri arqiliq yerlik xelqqe xitay zulmini pash qilghan.