Tokyoda échilghan pelestin'ge yardem bérishi yighini musulmanlarni xosh qildi

Ötken ayda aljiriyining sherqidiki bénzin shirkitide xizmet qiliwatqan yaponiye gaz shirkitining xizmetchi xadimliridin 17 nepiri tutqun qilinip, mezkur weqede on nepiri öltürülgen idi.Yaponiye bash weziri shinzo abé derhal özining alahide wekili, yaponiye tashqi ishlar ministirlikining mu'awin ministiri suzukini mexsus ayropilan bilen aljiriyige ewetip, aljiriye terep bilen söhbet ötküzüshke,weqede ölüp ketkenlerning jesitini yaponiyige qayturup kélishke ewetken idi.
Ixtiyariy muxbirimiz qutluq
2013-02-17
Share


Weqe yüz bergendin kéyin yaponiye jem'iyitide yashawatqan musulmanlar yaponiye jem'iyitidiki bezi kishilerning islam diniy bilen térrorizmni bir birige chétip, kishilerde islam dinigha, islam döletlirige bolghan xata uqumning peyda bolup qilishidin ensirigen idi.

Emma yaponiye hökümitining sahibxanliqida 2 - ayning 13 - küni tokyoda sherqiy asiya ellirining pelestinning tereqqiyatigha yardem bérish seperwerlik yighini bashlan'ghandin kéyin yaponiyidiki köpligen musulmanlar, yaponiye hökümitining bu herikitidin tolimu xursen boldi.

2 - Ayning 13 - küni tokyoda bashlan'ghan yaponiye tashqi ishlar ministirliki sahipxanliqidiki tunji qétimliq sherqiy asiya ellirining pelestinning tereqqiyatigha yardem bérish seperwerlik yighini ikki kün ghelibilik échilip yépildi. Yighin'gha brunéy,hindonéziye,koriye,tayland,malayshiya, sin'gapor,wétnam, ereb birleshmisi we islam tereqqiyat bankisi hem birleshken döletler teshkilati qatnashti.

2 - Ayning 14 - küni yaponiye bash weziri shinzo abé yétekchilikidiki yaponiye hökümiti tokyoda ottura sherqtiki pelestin aliy hoquq kéngishining rehberliri bilen yaponiye hökümitining nurghunlighan türler boyiche pelestin'ge yardem béridighanliqi heqqide wedileshkendin kéyin,bu xewer 2 - ayning 15 - küni,yeni musulmanlarning jüme namizi künide metbu'atda élan qilindi. Yaponiyide olturaqliship yashawatqan köpligen musulmanlar yaponiye hökümitining bu aliy janabliq insaniy yardimidin özlirining tolimu memnun bolghanliqini ipadilimekte.

Biz bu munasiwet bilen tokyodiki chong mesjitlerdin biri bolghan türkiye medeniyet merkizidiki türk mesjitige téléfon qilip, jüme namizidin yan'ghan bir qisim musulmanlar bilen söhbet élip barduq. Yaponiyide yashawatqan türkiyilik doktor refet ziyaritimizni qobul qilip mundaq dédi:

Yaponiyining pelestin'ge yardem bérishi tolimu yaxshi bir ish.Yaponlar bu arqiliq pelestindiki nurghunlighan ach - yalingach balilarni qutquzup qalalaydu.Bu heqiqeten insaniy bir yardem dep oylaymen.Men shexsen bir musulman bolush süpitim bilen yaponiye hökümitige we xelqige rexmet éytimen.

Yaponiyidiki satsuma islam medeniyet merkizining mes'ulliridin biri bolghan pakistanliq doktor muhemmed awzal bu heqte toxtilip mundaq dédi:

Yaponiye hökümitige,xelqige minetdarliqimni bildürimen. Yoqsul insanlargha yardem bérish her bir isanning insaniy burchi. Insaniy yardem din,dölet we millet ayrimaydu.

Ilgiri ottura sherqtiki elllerde köpligen tetqiqatlarni élip barghan, hazir yaponiyidiki musulmanlarning pa'aliyetlirini aktip qollap quwwetlep kéliwatqan yaponiyilik musulmanlarning dosti tetqiqatchi,noriko xanim özining tesiratini bayan qilip mundaq dédi:

Shinzo abé janabliri bashchiliqidiki bu qétimqi pelestin'ge yardem bérish seperwerlik herikiti, yaponlarning bash tartip bolmaydighan insaniy burchi, yaponlar hergiz aljiriyidiki térroristlar teripidin öltürülgen qérindashliri sewebidin islam dinigha, islam döletlirige hergiz bashqiche köz qarashta bolmaydu dep oylaymen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet